পাকিস্তানৰ বিৰুদ্ধে এদিনীয়া শৃংখলা দখল বাংলাদেশৰ

তৃতীয়খন এদিনীয়া খেলত পাকিস্তানক ১১ ৰানত পৰাস্ত কৰি তিনিখন খেলৰ শৃংখলা ২-১ত জয়লাভ কৰে বাংলাদেশে। ঢাকাৰ শ্বেৰ-ই-বাংলা ৰাষ্ট্ৰীয় ষ্টেডিয়ামত তানজিদ হাছান তামিমে এক সুন্দৰ শতক অৰ্জন কৰি ৫০ অভাৰত ৫ উইকেটত ২৯০ ৰান সংগ্ৰহ কৰি নিজৰ দলটোক পথ প্ৰদৰ্শন কৰে। ইয়াৰ উত্তৰত পাকিস্তানে ৫০ অভাৰত ২৭৯ ৰান সংগ্ৰহ কৰি অল আউট হয়। পাকিস্তানৰ হৈ ছলমান আঘাই ১০৬ ৰানৰ সুন্দৰ ইনিংছ খেলিছিল যদিও তেওঁৰ শতকটোৱে দলটোক পৰাজয়ৰ পৰা ৰক্ষা কৰিব নোৱাৰিলে। টছত পৰাস্ত হৈ প্ৰথমে বেটিং কৰাৰ পিছত বাংলাদেশে স্থিৰ আৰম্ভণি কৰে। ছাইফ হাছান (৩৬) আৰু তানজিদ হাছান তামিমে প্ৰথম উইকেটৰ বাবে ১০৫ ৰানৰ অংশীদাৰিত্ব স্থাপন কৰে। ছাইফৰ আউট হোৱাৰ পাছতো তামিমে নিজৰ আগ্ৰাসী বেটিং অব্যাহত ৰাখি ১০৭ বলত ১০৭ ৰানৰ সুন্দৰ ইনিংছ খেলিছিল।

তেওঁ নিজৰ ইনিংছত ৬টা চাৰি আৰু ৭টা ছয় মাৰে। মিডল অৰ্ডাৰত নাজমুল হোছেইন শান্তো (২৭) আৰু লিটন দাসে ৪১ (৪১) দলটোক স্থিৰ কৰে। অন্তিম অভাৰত তৌহীদ হৃদয়ে ৪৪ বলত অপৰাজিত ৪৮ ৰান সংগ্ৰহ কৰি দলটোক ২৯০ ৰানলৈ লৈ যায়।পাকিস্তানৰ হৈ হৰিছ ৰাউফে তিনিটা উইকেট দখল কৰাৰ বিপৰীতে শ্বাহীন আফ্ৰিদি আৰু আব্ৰাৰ আহমেদে এটাকৈ উইকেট লাভ কৰে। ২৯১ ৰানৰ লক্ষ্য অনুসৰণ কৰি পাকিস্তানে মাত্ৰ ১৭ ৰানত তিনিটা উইকেট হেৰুৱাই বিপৰ্যয়জনক আৰম্ভণি কৰে। সাহিবজাদা ফাৰহান (৬), মাজ সাদাকাত (৬), আৰু মহম্মদ ৰিজৱান (৪) আগতীয়াকৈ আউট হয়। ইয়াৰ পিছতে গাজী ঘোৰী (২৯) আৰু আব্দুল ছামাদে (৩৪) ইনিংছ সুস্থিৰ কৰিবলৈ চেষ্টা কৰিছিল যদিও উল্লেখযোগ্য অংশীদাৰিত্ব গঢ়ি তুলিব নোৱাৰিলে।

মিডল অৰ্ডাৰত ছলমান আঘাই সুন্দৰ বেটিং কৰি ৯৮টা বলত ১০৬ ৰান সংগ্ৰহ কৰে। তেওঁ ৯টা চাৰি আৰু ৪টা ছয় কৰে। ছাদ মাছুদে তেওঁৰ সৈতে ৩৮ ৰান সংগ্ৰহ কৰে আৰু দুয়োজনে ৭৯ ৰানৰ গুৰুত্বপূৰ্ণ অংশীদাৰিত্ব ভাগ কৰে। ইয়াৰ পিছতে অধিনায়ক শ্বাহীন আফ্ৰিদীয়েও ৩৮টা বলত ৩৭ ৰান সংগ্ৰহ কৰি খেলখনক ৰোমাঞ্চকৰ কৰি তুলিছিল। ফাইনেল অভাৰত জয়ী হ’বলৈ পাকিস্তানক ১২ ৰানৰ প্ৰয়োজন হৈছিল যদিও বাংলাদেশী বলাৰসকলে হেঁচা বজাই ৰাখিছিল, আৰু সমগ্ৰ দলটোৱে ২৭৯ ৰানত বল আউট হৈছিল।