১৫ সংখ্যকবাৰৰ বাবে পোল ভল্টৰ বিশ্ব অভিলেখ ভংগ আৰ্মাণ্ড ডুপ্লাণ্টিছৰ

ছুইডেনৰ ষ্টাৰ প’ল ভল্টৰ আৰ্মাণ্ড ডুপ্লাণ্টিছে বৃহস্পতিবাৰে পুনৰ ইতিহাস ৰচনা কৰি ১৫ সংখ্যকবাৰৰ বাবে প’ল ভল্টৰ বিশ্ব অভিলেখ ভংগ কৰে। উপছালাত অনুষ্ঠিত প্ৰতিযোগিতাত ৬.৩১ মিটাৰত উল্লেখযোগ্য জাম্পৰে তেওঁ এক নতুন বিশ্ব অভিলেখ গঢ়িবলৈ সক্ষম হয়। ২৬ বছৰীয়া ডুপ্লাণ্টিছে প্ৰথম প্ৰচেষ্টাতে এই উচ্চতা ক্লিয়াৰ কৰে। ইয়াৰ পূৰ্বে তেওঁ প্ৰথম প্ৰচেষ্টাতে ৫.৬৫ মিটাৰ, ৫.৯০ মিটাৰ, আৰু ৬.০৮ মিটাৰ ক্লিয়াৰ কৰিছিল। ইয়াৰ পিছতে তেওঁ বাৰখন ২৩ চেণ্টিমিটাৰ বৃদ্ধি কৰি ৬.৩১ মিটাৰ বিশ্ব অভিলেখ সৃষ্টি কৰে আৰু প্ৰথম প্ৰচেষ্টাতে বাৰটো ক্লিয়াৰ কৰে।

২০২০ চনত ৬.১৭ মিটাৰ জঁপিয়াই পৰাৰ পিছত ডুপ্লাণ্টিছে এই অভিলেখ গঢ়িবলৈ সক্ষম হৈছে আৰু ধাৰাবাহিকভাৱে ইয়াৰ উন্নতি সাধন কৰি আহিছে। ছুইডেনৰ মাটিত তেওঁ দ্বিতীয়বাৰৰ বাবে বিশ্ব অভিলেখ গঢ়িবলৈ সক্ষম হৈছে। ইয়াৰ পূৰ্বে ২০২৫ চনৰ জুন মাহত ষ্টকহ’মত ৬.২৮ মিটাৰ জপিয়াইছিল। অভিলেখ গঢ়াৰ পিছত ডুপ্লাণ্টিছে দৰ্শকক কয় যে তেওঁৰ গৃহ দেশত এই কৃতিত্ব অৰ্জন কৰাটো তেওঁৰ বাবে অতি বিশেষ। তেওঁ কয় যে তেওঁ নিজৰ, পৰিয়ালৰ বাবে আৰু ছুইডেনৰ জনসাধাৰণৰ বাবে জপিয়াই পৰে।

প্ৰতিযোগিতাখনত ৬.০০ মিটাৰ জাম্প কৰি দ্বিতীয় স্থান লাভ কৰে নৰৱেৰ ছণ্ড্ৰে গুটৰ্মচেনে। ইফালে গ্ৰীচৰ ইমানুৱেল কাৰালিছে তিনিওটা চেষ্টাতে ৬.০০ মিটাৰ ক্লিয়াৰ কৰিবলৈ ব্যৰ্থ হয়। মাৰ্চ মাহৰ শেষৰ ফালে পোলেণ্ডৰ টৰুণত অনুষ্ঠিত হ’বলগীয়া বিশ্ব ইনড’ৰ চেম্পিয়নশ্বিপত এতিয়া ডুপ্লাণ্টিছে নিজৰ নতুন বিশ্ব অভিলেখ উন্নত কৰাৰ সুযোগ পাব।