স্বাস্থ্যৰ বাবে হানিকাৰক পেৰাচিটামল, কেলচিয়াম আৰু ভিটামিন ডি টেবলেট

কেন্দ্ৰীয় ঔষধ মানক নিয়ন্ত্ৰণ সংস্থাই (চিডিএছচিঅ’) তেঁওলোকৰ শেহতীয়া প্ৰতিবেদনত এনে কিছুমান ঔষধৰ নাম প্ৰকাশ কৰিছে, যিবোৰ সাধাৰণতে চিকিৎসাৰ বাবে ব্যৱহাৰ কৰা হয়। অৱশ্যে, এই ঔষধবোৰ মানদণ্ড পৰীক্ষাত অনুত্তীৰ্ণ হৈছে। মানদণ্ড পৰীক্ষাত অনুত্তীৰ্ণ হোৱা ঔষধৰ তালিকাত ৫৩ বিধ ঔষধ আছে। ইয়াত এনে কিছুমান ঔষধ অন্তৰ্ভুক্ত আছে, যিবোৰ সাধাৰণতে সকলোৱে ব্যৱহাৰ কৰে। ইয়াৰ ভিতৰত আছে পেৰাচিটামল, কেলচিয়াম আৰু ভিটামিন ডি টেবলেট। চিডিএছচিঅ’য়ে মানদণ্ড পৰীক্ষাত বিফল হোৱা বুলি কোৱা ঔষধবোৰৰ ভিতৰত পেণ্টোচিড টেবলেট আছে। এই ঔষধটো এচিড ৰিফ্লাক্সৰ চিকিৎসাৰ বাবে ব্যৱহাৰ কৰা হয়। ঔষধটো চান ফাৰ্মা কোম্পানীৰ দ্বাৰা নিৰ্মাণ কৰা হয়। ইয়াৰ বাহিৰেও, কেলচিয়াম আৰু ভিটামিন ডি টেবলেটেও মানদণ্ড পৰীক্ষাত উত্তীৰ্ণ হ’বলৈ সক্ষম হোৱা নাই। একে সময়তে, শ্বেলকাল আৰু পুলমোচিল বেজীও মানদণ্ড পৰীক্ষাত বিফল হৈছে। এইবোৰ উচ্চ ৰক্তচাপৰ চিকিৎসাত ব্যৱহাৰ কৰা হয়। লগতে, এলকেম হেল্থ চাইন্সৰ এণ্টিবায়টিক ক্লাভাম ৬২৫ ও ঔষধ পৰীক্ষাত বিফল হৈছে।চিডিএছচিঅ-য়ে ভুৱা, ভেজাল আৰু ভুল ব্ৰেণ্ডেড ঔষধ, চিকিৎসা সঁজুলি, ভেকছিন আৰু প্ৰসাধনসামগ্ৰীৰ এখন তালিকা প্ৰকাশ কৰিছে। ইয়াৰ ভিতৰত আছে পুলমোচিল (চিলডেনাফিল ইঞ্জেকচন), পেণ্টোচিড (পেণ্টোপ্ৰাজোল টেবলেট আইপি), উৰ্চোকল ৩০০ (উৰ্চোডেঅক্সিকোলিক এচিড টেবলেট ইণ্ডিয়ান ফাৰ্মাকোপিয়া)। ইয়াৰ উপৰিও, উৰ্চোকল ৩০০ টেবলেটৰ নমুনা, যাক পিত্তৰ পাথৰৰ চিকিৎসাত ব্যৱহাৰ কৰা হয়, এই কেইবিধ ঔষধ মানদণ্ড পৰীক্ষাত বিফল হৈছে।