পেৰিছ অলিম্পিকত পুনৰ স্বৰ্ণ পদক অৰ্জনৰ লক্ষ্য নীৰজ চোপ্ৰাৰ

বৰ্তমানৰ অলিম্পিক আৰু বিশ্ব চেম্পিয়ন জেভলিন থ্ৰ’য়াৰ নীৰজ চোপ্ৰাই ১০ মে’ত প্ৰতিষ্ঠিত ডায়মণ্ড লীগ শৃংখলাৰ দোহা লেগত তেওঁৰ ছিজন আৰম্ভ কৰিব। ২৬ বছৰীয়া চোপ্ৰাই চীনৰ হাংঝৌত অনুষ্ঠিত এছিয়ান গেমছত সোণৰ পদক লাভ কৰি যোৱা ছিজনটো সমাপ্ত কৰিছিল। এই বছৰ তেওঁৰ লক্ষ্য হ’ব পেৰিছ অলিম্পিকত পুনৰ স্বৰ্ণ পদক অৰ্জন কৰা। চোপ্ৰাৰ উপৰিও ভাৰতীয় খেলুৱৈ কিশোৰ জেনাই কাটাৰৰ ৰাজধানীত অনুষ্ঠিত হ’বলগীয়া ডায়মণ্ড লীগ পৰ্যায়ত আত্মপ্ৰকাশ কৰিব। জেনাই ২০২৩ চনৰ বুদাপেষ্ট বিশ্ব চেম্পিয়নশ্বিপত পঞ্চম স্থান লাভ কৰিছিল আৰু হাংঝৌত ৮৭.৫৪ মিটাৰ ব্যক্তিগত শ্ৰেষ্ঠতাৰে ৰূপৰ পদক জিকিছিল।
চোপ্ৰা চেক গণৰাজ্যৰ জাকুব ভাদলেজচ আৰু গ্ৰেনাডাৰ প্ৰাক্তন বিশ্ব চেম্পিয়ন এণ্ডাৰচন পিটাৰ্ছৰ দৰে খেলুৱৈৰ বিৰুদ্ধে অবতীৰ্ণ হ’ব। ২০২৩ চনৰ বিশ্ব চেম্পিয়নশ্বিপত টকিঅ’ অলিম্পিকত ভাডলেজচে ৰূপ আৰু ব্ৰঞ্জৰ পদক জিকিছিল। নীৰজ চোপ্ৰাই এই সন্দৰ্ভত কয় যে এই বছৰ, মোৰ ব্যক্তিগত লক্ষ্য হৈছে মোৰ অলিম্পিক খিতাপ ৰক্ষা কৰা, কিন্তু ৯০ মিটাৰ বাধা অতিক্ৰম কৰাটোও মোৰ বাবে যথেষ্ট অৰ্থপূৰ্ণ হ’ব। ভাল পৰিস্থিতি আৰু পৰিৱেশৰ মাজত দোহাত সৰ্বশ্ৰেষ্ঠ প্ৰদৰ্শনৰে ছিজন আৰম্ভ কৰাৰ এটা ভাল সুযোগ হ’ব। কাটাৰ স্পৰ্টছ ক্লাবত খেলপথাৰত অৱতীৰ্ণ হোৱা আন জেভলিন থ্ৰ’য়াৰসকলৰ ভিতৰত আছে জাৰ্মানীৰ ইউৰোপীয় চেম্পিয়ন জুলিয়েন ৱেবাৰ (শ্ৰেষ্ঠ ৮৯.৫৪ মিটাৰ), জাৰ্মানীৰ অলিভাৰ হেলাণ্ডাৰ (শ্ৰেষ্ঠ ৮৯.৮৩ মিটাৰ), কাটাৰৰ ৰেকৰ্ড ধাৰক আহমেদ বেডাৰ মাগুৰ (শ্ৰেষ্ঠ ৮৫.২৩ মিটাৰ), লিথুৱানিয়ান ৰেকৰ্ড ধাৰক আৰু বিশ্ব বিশ্ববিদ্যালয় গেমছ চেম্পিয়ন এডিছ মাটিউজভিচিয়াছ (শ্ৰেষ্ঠ ৮৯.১৭ মিটাৰ)। চোপ্ৰাই ২০২৩ চনৰ ছিজনত ৮৮.৬৭ মিটাৰ থ্ৰ’ৰ সৈতে শীৰ্ষস্থান দখল কৰিছিল। দোহা মিট হৈছে ২০২৪ চনৰ ডায়মণ্ড লীগ শৃংখলাৰ তৃতীয় পৰ্যায়। ডায়মণ্ড লীগ চাৰিখন পৃথক মহাদেশত মুঠ ১৫ টা পৰ্যায়ত অনুষ্ঠিত হয়। ই ২০ এপ্ৰিলত জিয়ামেনত মুকলি হৈছিল আৰু ব্ৰাচেলছত ইয়াৰ অন্তিম পৰ্যায়টো (১৩-১৪ ছেপ্টেম্বৰ) আয়োজন কৰিব।