দিল্লীত পুনৰ বৰ্ণবৈষম্যৰ চিকাৰ উত্তৰ-পূবৰ দুই যুৱতী; উদ্যানত ফুৰিবলৈ গৈ দুৰ্বৃত্তৰ আক্ৰমণৰ বলি

আকৌ দেশৰ অন্য প্ৰান্তত বৰ্ণবৈষম্যৰ চিকাৰ হ’ল উত্তৰ-পূবৰ নাগৰিক! ৰাষ্ট্ৰীয় ৰাজধানী দিল্লীত এগৰাকী মণিপুৰী যুৱতী আৰু এগৰাকী তৃতীয় লিংগৰ ব্যক্তিক এদল দুৰ্বৃত্তই অতি জঘন্যভাৱে আক্ৰমণ কৰা ঘটনাই সমগ্ৰ দেশতে তীব্ৰ চাঞ্চল্যৰ সৃষ্টি কৰিছে। দেশৰ নিৰাপদ বুলি ভবা ঠাইতো যে উত্তৰ-পূবৰ লোকসকল আজিও সুৰক্ষিত নহয়, সেই কথাই এতিয়া সকলোৰে মনত আৱেগ আৰু উদ্বেগৰ সৃষ্টি কৰিছে।

ঘটনাটোৰ বিৱৰণী অনুসৰি, সাকেট জিলা আদালত কমপ্লেক্সৰ সমীপৰ এখন উদ্যানত ফুৰি থকা অৱস্থাতে এদল যুৱকে তেওঁলোকক লক্ষ্য কৰি বৰ্ণবিদ্বেষী কটু মন্তব্য কৰে। যেতিয়া মণিপুৰী যুৱতীগৰাকীয়ে ইয়াৰ প্ৰতিবাদ কৰে, তেতিয়াই পৰিস্থিতি উত্তপ্ত হৈ পৰে আৰু যুৱকৰ দলটোৱে তেওঁলোকক বেল্টেৰে ধাৰাসাৰ প্ৰহাৰ কৰিবলৈ আৰম্ভ কৰে। ভুক্তভোগীসকলে অভিযোগ কৰা মতে, তেওঁলোকে ইয়াৰ পূৰ্বেও অঞ্চলটোত কেইবাবাৰো এনে নিৰ্যাতনৰ মুখামুখি হৈছিল।

দিল্লী আৰক্ষীয়ে এই সন্দৰ্ভত এক চৰকাৰী বিবৃতিত কয়, “ঘটনাটোৰ খবৰ পোৱাৰ লগে লগে আমাৰ এটা দল ঘটনাস্থলীত উপস্থিত হয়। যিগৰাকী যুৱতীয়ে যুৱককেইজনৰ মন্তব্যত আপত্তি দৰ্শাইছিল, তেওঁকেই অভিযুক্তসকলে বেয়াকৈ প্ৰহাৰ কৰিছিল।” আহত যুৱতীগৰাকীক তৎক্ষণাত চফদৰজং চিকিৎসালয়লৈ লৈ যোৱা হয়। আৰক্ষীয়ে আশ্বাস দিছে যে দোষীৰ বিৰুদ্ধে অতি সোনকালে কঠোৰ ব্যৱস্থা গ্ৰহণ কৰা হ’ব।

উল্লেখনীয় যে, মাত্ৰ কেইদিনমান পূৰ্বে দিল্লীৰে আন এজন ব্যক্তিয়ে অৰুণাচল প্ৰদেশৰ তিনিগৰাকী যুৱতীক ‘মোমো বিক্ৰী কৰিবলৈ যা’ আদি কৰি জঘন্য বৰ্ণবিদ্বেষী গালি-গালাজ দিয়াৰ অভিযোগত গ্ৰেপ্তাৰ হৈছিল। দিল্লীত ইটোৰ পাছত সিটো এনে বৰ্ণবিদ্বেষী ঘটনাই এতিয়া উত্তৰ-পূবৰ জনসাধাৰণৰ মাজত তীব্ৰ অসন্তুষ্টি আৰু নিৰাপত্তাহীনতাৰ সৃষ্টি কৰিছে।