বিদেশী ন্যায়াধিকৰণৰ ঘোষণাৰ পাছতেই তৎপৰ প্ৰশাসনঃ দুই বাংলাদেশী মহিলাক ২৪ ঘণ্টাৰ ভিতৰত দেশত্যাগৰ নিৰ্দেশ

অসমৰ মাটিত অবৈধভাৱে বসবাস কৰি থকা বিদেশীসকলক চিনাক্ত কৰি বহিষ্কাৰ কৰাৰ যি প্ৰক্ৰিয়া চৰকাৰে হাতত লৈছে, তাৰ অংশস্বৰূপে বিশ্বনাথ জিলাত এক কঠোৰ পদক্ষেপ গ্ৰহণ কৰা হৈছে। বিদেশী ন্যায়াধিকৰণে বাংলাদেশী বুলি ঘোষণা কৰা দুগৰাকী মহিলাক সোমবাৰে জিলা প্ৰশাসনে ২৪ ঘণ্টাৰ ভিতৰত ভাৰত ত্যাগ কৰিবলৈ চৰম নিৰ্দেশ দিয়ে। ৰাজ্যৰ ভৌগোলিক অখণ্ডতা আৰু আইনী প্ৰক্ৰিয়াক অধিক ক্ষিপ্ৰতাৰে কাৰ্যকৰী কৰাৰ উদ্দেশ্যেই প্ৰশাসনে এই চৰম সীমা নিৰ্ধাৰণ কৰি দিছে বুলি ধাৰণা কৰা হৈছে।

বিদেশী হিচাপে ঘোষিত এই দুই মহিলা মিছামাৰী গাঁৱৰ আছমুল খাতুন আৰু বক্ৰাপাট্টা গাঁৱৰ আফুজা বেগম বুলি চিনাক্ত কৰা হৈছে। বিশ্বনাথৰ জিলা আয়ুক্ত লক্ষীনন্দন চহৰীয়াই ১৯৫০ চনৰ অনুপ্ৰৱেশকাৰী (অসমৰ পৰা বহিষ্কাৰ) আইনৰ ২ নং ধাৰাৰ অধীনত এই বহিষ্কাৰৰ নিৰ্দেশ জাৰি কৰে। আদেশ লাভ কৰাৰ ২৪ ঘণ্টাৰ ভিতৰত ধুবুৰী, শ্ৰীভূমি অথবা দক্ষিণ শালমাৰা-মানকাচৰ সীমান্তৰে তেওঁলোকক ভাৰতীয় ভূখণ্ড ত্যাগ কৰিবলৈ কোৱা হৈছে। উল্লেখযোগ্য যে, নিৰ্ধাৰিত সময়ত এই নিৰ্দেশ পালন নকৰিলে চৰকাৰে তেওঁলোকক বলপূৰ্বক বহিষ্কাৰ কৰিবলৈ যাৱতীয় আইনী ব্যৱস্থা গ্ৰহণ কৰিব।

তদুপৰি জিলা প্ৰশাসনে স্পষ্ট কৰি দিছে যে বিদেশী ন্যায়াধিকৰণৰ ৰায় কাৰ্যকৰী কৰাৰ ক্ষেত্ৰত এতিয়াৰে পৰা কোনো ধৰণৰ শিথিলতা অৱলম্বন কৰা নহ’ব। আনহাতে যোৱা ১৮ ডিচেম্বৰতো নগাঁও জিলা প্ৰশাসনে একেদৰে ১৫ গৰাকী ঘোষিত বিদেশীক দেশত্যাগৰ নিৰ্দেশ দিছিল। সমগ্ৰ ৰাজ্যতে এতিয়া ঘোষিত বিদেশীসকলক চিনাক্ত কৰি তেওঁলোকক নিজ দেশলৈ ওভতাই পঠোৱাৰ এই প্ৰক্ৰিয়াটো অধিক তীব্ৰতৰ হৈ পৰিছে। এই ধাৰাবাহিক পদক্ষেপে ৰাজ্যৰ অনুপ্ৰৱেশৰ সমস্যা সমাধানৰ ক্ষেত্ৰত চৰকাৰৰ দৃঢ় স্থিতিকেই প্ৰতিপন্ন কৰিছে।