ৱাশ্বিংটনৰ বাবে ভাৰততকৈ প্ৰয়োজনীয় দেশ আন কোনো নাইঃ আমেৰিকাৰ ৰাষ্ট্ৰদূত

দুই ৰাষ্ট্ৰপ্ৰধানৰ ব্যক্তিগত বন্ধুত্ব আৰু অৰ্থনৈতিক স্বাৰ্থই এতিয়া বিশ্বৰ দুই বৃহৎ গণতন্ত্ৰক পূৰ্বতকৈও অধিক কাষ চপাই আনিছে। আমেৰিকা যুক্তৰাষ্ট্ৰৰ মনোনীত ৰাষ্ট্ৰদূত চাৰ্জিও গোৰে সোমবাৰে নতুন দিল্লীত উপস্থিত হৈ স্পষ্ট কৰি দিয়ে যে ৱাশ্বিংটনৰ বাবে ভাৰততকৈ প্ৰয়োজনীয় দেশ আন কোনো নাই। প্ৰধানমন্ত্ৰী নৰেন্দ্ৰ মোদী আৰু ৰাষ্ট্ৰপতি ডোনাল্ড ট্ৰাম্পৰ মাজত থকা সুগভীৰ বন্ধুত্বৰ প্ৰসংগ উত্থাপন কৰি তেওঁ জানিবলৈ দিয়ে যে দুই পক্ষই বৰ্তমান এখন গুৰুত্বপূৰ্ণ বাণিজ্য চুক্তি চূড়ান্ত কৰাৰ দিশত সক্ৰিয়ভাৱে কাম কৰি আছে।

আমেৰিকাৰ দূতাবাসত আয়োজিত এক অনুষ্ঠানত ভাষণ দি মনোনীত ৰাষ্ট্ৰদূতগৰাকীয়ে কয়, “প্ৰকৃত বন্ধুৰ মাজত মতানৈক্য থাকিব পাৰে, কিন্তু তেওঁলোকে সদায় শেষত সকলো সমস্যা সমাধান কৰি লয়।” তেওঁ জানিবলৈ দিয়ে যে ভাৰত বিশ্বৰ সৰ্ববৃহৎ জনবহুল দেশ হোৱাৰ পৰিপ্ৰেক্ষিতত বাণিজ্য চুক্তিখন সম্পূৰ্ণ কৰাটো সহজ কাম নহয়, তথাপিও আমেৰিকা এই লক্ষ্যত উপনীত হ’বলৈ বদ্ধপৰিকৰ। বাণিজ্যৰ উপৰিও নিৰাপত্তা, সন্ত্ৰাসবাদ বিৰোধী অভিযান, শক্তি, প্ৰযুক্তি, শিক্ষা আৰু স্বাস্থ্য খণ্ডত দুয়োখন দেশে ঘনিষ্ঠভাৱে কাম কৰি যাব বুলি তেওঁ উল্লেখ কৰে।

এই অনুষ্ঠানতে গোৰে এক গুৰুত্বপূৰ্ণ ঘোষণা কৰি জনায় যে ভাৰতক আমেৰিকাৰ নেতৃত্বত গঠিত ‘পেক্স চিলিকা’ মিত্ৰজোঁটৰ পূৰ্ণকালীন সদস্য হিচাপে আমন্ত্ৰণ জনোৱা হ’ব। অহা মাহত ভাৰতে আনুষ্ঠানিকভাৱে এই গোটত যোগদান কৰিব বুলি তেওঁ জানিবলৈ দিয়ে। উল্লেখ্য যে, এই মিত্ৰজোঁটটো হৈছে এক সুৰক্ষিত আৰু উদ্ভাৱনীমূলক চিলিকন যোগান শৃংখল গঢ়ি তোলাৰ বাবে আমেৰিকাই গ্ৰহণ কৰা এক গুৰুত্বপূৰ্ণ কৌশলগত পদক্ষেপ।

তদুপৰি ৰাষ্ট্ৰপতি ট্ৰাম্পৰ সৈতে সমগ্ৰ বিশ্ব ভ্ৰমণ কৰাৰ অভিজ্ঞতাৰ পৰা গোৰে দাবী কৰে যে প্ৰধানমন্ত্ৰী মোদীৰ সৈতে ট্ৰাম্পৰ বন্ধুত্ব অতি প্ৰকৃতাৰ্থত গভীৰ। তেওঁৰ মতে, এই শক্তিশালী ব্যক্তিগত সম্পৰ্কই আগন্তুক দিনত দুয়োখন দেশৰ দ্বিপাক্ষিক সম্পৰ্কক এক নতুন উচ্চতালৈ লৈ যাব। ভাৰতৰ দৰে এখন গুৰুত্বপূৰ্ণ অংশীদাৰৰ সৈতে কাম কৰিবলৈ তেওঁ অধীৰ আগ্ৰহেৰে অপেক্ষা কৰিছে বুলিও জানিবলৈ দিয়ে।