ডিজিটেল জালিয়াতিৰ বলি হোৱা গ্ৰাহকক ৰিজাৰ্ভ বেংকে প্ৰদান কৰিব ক্ষতিপূৰণ

ডিজিটেল লেনদেনত প্ৰতাৰণাৰ বলি হোৱা বেংক গ্ৰাহকসকলৰ বাবে আজি ভাৰতীয় ৰিজাৰ্ভ বেংকে এক গুৰুত্বপূৰ্ণ ঘোষণা কৰিছে। ৰিজাৰ্ভ বেংকৰ গভৰ্ণৰ সঞ্জয় মালহোত্ৰাই সংবাদমেল যোগে জানিবলৈ দিয়ে যে এতিয়াৰে পৰা যিকোনো ফ্ৰড ট্ৰানজেকচনৰ বাবে এজন গ্ৰাহকে ২৫ হাজাৰ টকা পৰ্যন্ত ক্ষতিপূৰণ লাভ কৰিব।

বিশেষভাৱে মন কৰিবলগীয়া যে গ্ৰাহকে নিজৰ অজ্ঞাতে প্ৰবঞ্চকক অ’টিপি (OTP) দি দিলেও এই সুৰক্ষা ব্যৱস্থাৰ অধীনত তেওঁলোকক ক্ষতিপূৰণ প্ৰদান কৰা হ’ব।

ৰিজাৰ্ভ বেংকৰ ৮৫ হাজাৰ কোটি টকাৰ ‘ডিপজিটৰ এডুকেচন এণ্ড এৱেৰনেছ ফাণ্ড’ৰ পৰা এই ধন প্ৰদান কৰা হ’ব বুলি কেন্দ্ৰীয় বেংকটোৰ বিষয়ালে জানিবলৈ দিছে। অৱশ্যে এজন গ্ৰাহকে জীৱনকালত কেৱল এবাৰহে এই সুবিধা লাভ কৰিব পাৰিব আৰু তাত কোনো ধৰণৰ অভিপ্ৰায় থকাটো উচিত নহ’ব। গভৰ্ণৰ মালহোত্ৰাই কয়, “যেতিয়ালৈকে তেওঁলোক প্ৰতাৰিত হয়, সেয়া তেওঁলোকৰ নিজৰ ভুলতেই হওক বা আনৰ বাবেই হওক, আমি ২৫ হাজাৰ টকালৈকে ক্ষতিপূৰণ দিম।”

আৰ বি আইৰ তথ্য অনুসৰি, দেশত সংঘটিত হোৱা মুঠ ডিজিটেল জালিয়াতিৰ দুই-তৃতীয়াংশৰে পৰিমাণ ৫০ হাজাৰ টকাতকৈ কম। সেয়েহে এই নতুন নীতিৰ দ্বাৰা বৃহৎ সংখ্যক সাধাৰণ গ্ৰাহক উপকৃত হ’ব। অৱশ্যে নিৰাপত্তাৰ খাতিৰত গ্ৰাহকৰ নিজৰো দায়বদ্ধতা নিশ্চিত কৰিবলৈ মুঠ লোকচানৰ ১৫ শতাংশ গ্ৰাহকে বহন কৰিব লাগিব। ইয়াৰ উপৰি অধিক মূল্যৰ জালিয়াতিৰ ক্ষেত্ৰতো ক্ষতিপূৰণৰ সৰ্বোচ্চ সীমা ২৫ হাজাৰ টকাতে স্থিৰ কৰা হৈছে।

ডেপুটি গভৰ্ণৰ স্বামীনাথন জে-ই উল্লেখ কৰে যে এই পদক্ষেপৰ দ্বাৰা বিশেষকৈ নিৰীহ লোকসকলক সামৰি লোৱাৰ চেষ্টা কৰা হৈছে। আনহাতে, জ্যেষ্ঠ নাগৰিকসকল যাতে প্ৰতাৰণাৰ বলি নহয়, তাৰ বাবে অতিৰিক্ত নিৰাপত্তা ব্যৱস্থা আৰু এজন হিতাধিকাৰীৰ একাউণ্টত জমা হোৱা ধনৰ ক্ষেত্ৰত সময়ৰ ব্যৱধান (lagged credit) ৰখাৰ দৰে নতুন আহিলাও আৰ বি আয়ে শীঘ্ৰেই মুকলি কৰিব। এই সন্দৰ্ভত এক খচৰা অতি সোনকালে জনসাধাৰণৰ মতামতৰ বাবে প্ৰকাশ কৰা হ’ব।