পেহেলগাম সন্ত্ৰাসবাদী আক্ৰমণৰ মূল ষড়যন্ত্ৰকাৰী আছিল পাকিস্তানৰ লস্কৰ-ই-তৈবাৰ সদস্য ছাজিদ জোট

পেহেলগাম সন্ত্ৰাসবাদী আক্ৰমণৰ মূল ষড়যন্ত্ৰকাৰী আছিল পাকিস্তানস্থিত লস্কৰ-ই-তৈবাৰ সদস্য ছাজিদ জোট। সোমবাৰে এনআইএয়ে দাখিল কৰা চাৰ্জশ্বীটত উল্লেখ কৰা হৈছে এই কথা। পাকিস্তানৰ পঞ্জাৱ প্ৰদেশৰ কাছোৰ জিলাৰ বাসিন্দা এই সদস্যজনে আক্ৰমণৰ সূত্ৰপাত সীমান্তৰ সিপাৰৰ পৰা পৰিচালনা কৰিছিল। এই আক্ৰমণত ২৫ জন পৰ্যটক আৰু এজন স্থানীয় নাগৰিকৰ মৃত্যু হৈছিল।

নিষিদ্ধ কাৰ্যকলাপ (প্ৰতিৰোধ) আইন (UAPA)ৰ অধীনত জাৰী কৰা বিধিবদ্ধ সময়সীমাৰ পূৰ্বে ৰাষ্ট্ৰীয় অনুসন্ধান সংস্থাই জম্মুৰ বিশেষ আদালতত ১,৫৯৭ পৃষ্ঠাৰ অভিযোগনামা দাখিল কৰে। সংস্থাই অভিযোগনামাত ছাজিদ জোটকে ধৰি সাতজন অভিযুক্তৰ নাম উল্লেখ কৰিছে। তেওঁলোকে জোটক লস্কৰ-ই-তৈবা আৰু ইয়াৰ প্ৰক্সি সংগঠন ‘দ্য ৰেজিষ্টেন্স ফ্ৰণ্ট’ৰ জৰিয়তে আক্ৰমণটোৰ সমন্বয় সাধন কৰা এজন পাকিস্তানস্থিত হেণ্ডলাৰ বুলি অভিহিত কৰিছে।

এই আক্ৰমণ পেহেলগামৰ ওচৰৰ জনপ্ৰিয় পৰ্যটনস্থলী বৈছাৰণত সংঘটিত হৈছিল, যাক ‘মিনি ছুইজাৰলেণ্ড’ বুলিও কোৱা হয়। পৰ্যটনৰ শীৰ্ষ সময়ত অত্যাধুনিক অস্ত্ৰৰে সজ্জিত সন্ত্ৰাসবাদীয়ে পৰ্যটকসকলৰ ওপৰত গুলীচালনা কৰিছিল। এই হত্যাকাণ্ডই সমগ্ৰ দেশজুৰি তীব্ৰ ক্ষোভৰ সৃষ্টি কৰে আৰু কাশ্মীৰৰ পৰ্যটন খণ্ডত এক বৃহৎ আঘাত হানিছিল।

এক গুৰুত্বপূৰ্ণ আইনী পদক্ষেপত, এনআইএয়ে লস্কৰ আৰু টিআৰএফ উভয়কে সন্ত্ৰাসবাদী সংস্থা হিচাপে আনুষ্ঠানিকভাৱে অভিযোগনামাত নাম দিয়ে। তেওঁলোকে ভাৰতীয় ন্যায় সংহিতা, অস্ত্ৰ আইন, ১৯৫৯, আৰু ইউ এ পি এৰ বহুতো ধাৰা সংযোগ কৰে, যাৰ ভিতৰত ভাৰতৰ বিৰুদ্ধে যুদ্ধ ঘোষণা কৰাৰ ধাৰাসমূহো আছে। বিষয়াসকলে কয়, প্ৰায় আঠ মাহ ধৰি সংগ্ৰহ কৰা ফৰেনছিক, ডিজিটেল আৰু কাৰিকৰী প্ৰমাণেৰে এই অভিযোগনামা প্ৰস্তুত কৰা হৈছে।

সংস্থাটোৱে আক্ৰমণৰ কেইসপ্তাহমান পিছত শ্ৰীনগৰৰ উপকণ্ঠৰ ডাচিগামত ‘অপাৰেচন মহাদেৱ’ৰ সময়ত নিহত হোৱা তিনিজন পাকিস্তানী সন্ত্ৰাসবাদীৰ নামো উল্লেখ কৰিছে। তেওঁলোকক ফাইজল জোট ওৰফে সুলেমান শ্বাহ, হাবিৱ তাহিৰ ওৰফে জিব্ৰান আৰু হামজা আফগানী হিচাপে চিনাক্ত কৰা হয়। এওঁলোক তিনিও নিষিদ্ধ লস্কৰ-এ তৈবাৰ সংগঠনৰ সৈতে জড়িত আছিল।

এন আই এৰ মতে, পেহেলগামৰ দুজন স্থানীয় বাসিন্দা পাৰভেজ আহমদ আৰু বশ্বীৰ আহমদ জথাৰক সন্ত্ৰাসবাদীসকলক আশ্ৰয় দিয়া আৰু লজিষ্টিক সমৰ্থন আগবঢ়োৱাৰ অভিযোগত ২২ জুনত গ্ৰেপ্তাৰ কৰা হৈছিল। জেৰাৰ সময়ত তেওঁলোকে আক্ৰমণকাৰীসকলৰ পৰিচয় ফাদিল কৰে আৰু নিশ্চিত কৰে যে আক্ৰমণকাৰীসকল নিয়ন্ত্ৰণ ৰেখাৰ সিপাৰৰ পৰা অনুপ্ৰৱেশ কৰা পাকিস্তানী নাগৰিক আছিল।

তদন্তকাৰীসকলে কয় যে আক্ৰমণকাৰীসকলে দক্ষিণ কাশ্মীৰত ভূমি সমৰ্থন লাভ কৰিছিল। এই সমৰ্থনে তেওঁলোকক ভিৰ কৰা অসামৰিক স্থানত আক্ৰমণ কৰি তাৰ পিছত পলাই যাবলৈ সক্ষম কৰি তোলে। এন আই এয়ে লগতে কয় যে পাকিস্তানে অনুচ্ছেদ ৩৭০ বাতিলৰ পিছত স্থানীয় মুখা পিন্ধাবলৈ সৃষ্টি কৰা টিআৰএফৰ দৰে প্ৰক্সি সংগঠনৰ জৰিয়তে জম্মু-কাশ্মীৰত সন্ত্ৰাসবাদক পৃষ্ঠপোষকতা দি আহিছে।