মণিপুৰত পুনৰ উত্তেজনা! সুৰক্ষাৰ খাতিৰত ৫১ গৰাকী কুকি শিক্ষাৰ্থীক নিৰাপদ স্থানলৈ স্থানান্তৰ

নাগা আৰু কুকি সম্প্ৰদায়ৰ মাজত সৃষ্টি হোৱা তীব্ৰ সংঘাতৰ পৰিপ্ৰেক্ষিতত মণিপুৰৰ উখৰুল জিলাৰ জৱাহৰ নবোদয় বিদ্যালয়ৰ পৰা ৫১ গৰাকী কুকি ছাত্ৰ-ছাত্ৰীক নিৰাপদ স্থানলৈ স্থানান্তৰ কৰা হৈছে। উখৰুল জিলাৰ লিটান চাৰিখং অঞ্চলত দুয়োটা পক্ষৰ মাজত হোৱা সংঘৰ্ষত প্ৰায় ৩০ টা বাসগৃহ ভস্মীভূত হোৱাৰ পাছতে ছাত্ৰ-ছাত্ৰীসকলৰ নিৰাপত্তাক লৈ শংকাৰ সৃষ্টি হৈছিল। পৰিস্থিতি অধিক অৱনতি হোৱাৰ আশংকাত আৰক্ষীয়ে এই সতৰ্কতামূলক পদক্ষেপ গ্ৰহণ কৰে।

উখৰুল জিলা আৰক্ষীয়ে এক বিবৃতিত জনাইছে যে ৫১ গৰাকী ছাত্ৰ-ছাত্ৰীক ৰামভাৰ জেএনভিৰ পৰা উদ্ধাৰ কৰি ক্ৰমে কাংপোকপি জিলাৰ চাইকুল আৰক্ষীক গতাই দিয়া হৈছে। আৰক্ষীয়ে কয়, “আমি ছাত্ৰ-ছাত্ৰীসকলক সুৰক্ষিতভাৱে কাংপোকপিৰ জেএনভিলৈ প্ৰেৰণৰ ব্যৱস্থা কৰিছোঁ। এই দলটোত ৩১ জন ছাত্ৰ আৰু ২০ গৰাকী ছাত্ৰী আছে, যিসকলক কঢ়িয়াই নিয়াৰ সময়ত আৰক্ষীয়ে বিশেষ সুৰক্ষা ব্যৱস্থা গ্ৰহণ কৰিছিল।

ছাত্ৰ-ছাত্ৰীসকলক স্থানান্তৰ কৰাৰ সময়ত একাংশ স্থানীয় লোকে তেওঁলোকক দুৰ্বৃত্ত বুলি ভুল বুজি কিছু উত্তেজনাৰ সৃষ্টি কৰিছিল। অৱশ্যে স্থানীয় অসামৰিক সংগঠনসমূহৰ হস্তক্ষেপত পৰিস্থিতি শান্ত হয়। ছাংছাক, ৰামভা আৰু অন্যান্য অঞ্চলৰ ৰাইজক বুজাই ছাত্ৰ-ছাত্ৰীসকলৰ নিৰাপদ যাত্ৰা নিশ্চিত কৰাৰ বাবে আৰক্ষীয়ে স্থানীয় সংগঠনসমূহক ধন্যবাদ জ্ঞাপন কৰে।

উল্লেখ্য যে যোৱা ৭ ফেব্ৰুৱাৰীত লিটানত দুটা গোটৰ মাজত হোৱা এক সামান্য তৰ্ক-বিতৰ্কই পাছলৈ ভয়াৱহ গোষ্ঠীগত সংঘৰ্ষৰ ৰূপ লৈছিল। মণিপুৰত ২০২৩ চনৰ মে’ মাহৰ পৰাই মেইটেই আৰু কুকি সম্প্ৰদায়ৰ মাজত চলি থকা হিংসাত্মক ঘটনাত এতিয়ালৈকে ২৬০ জনতকৈ অধিক লোকে প্ৰাণ হেৰুৱাইছে। ৰাজ্যখনত বৰ্তমান ৰাষ্ট্ৰপতি শাসন চলি আছে যদিও শান্তি ঘূৰাই অনাৰ প্ৰচেষ্টা অব্যাহত ৰখা হৈছে।