দেশবাসীৰ মনৰ পৰা হীনমন্যতা দূৰ কৰাটোৱেই প্ৰধানমন্ত্ৰী মোদীৰ আটাইতকৈ ডাঙৰ সফলতাঃ অমিত শ্বাহ

ভাৰতীয় নাগৰিকৰ চিন্তা-চেতনা আৰু আত্মবিশ্বাসৰ আমূল পৰিৱৰ্তনক লৈ কেন্দ্ৰীয় গৃহমন্ত্ৰী অমিত শ্বাহে দেওবাৰে এক বিশেষ মন্তব্য আগবঢ়ায়। প্ৰধানমন্ত্ৰী নৰেন্দ্ৰ মোদীৰ জীৱনৰ আধাৰত নিৰ্মিত সংগীতময় মাল্টিমিডিয়া শ্ব’ ‘নমোৎসৱ’ৰ পূৰ্বে আহমেদাবাদত এক সমাৱেশক সম্বোধন কৰি শ্বাহে কয় যে ১৪০ কোটি ভাৰতীয়ৰ মনৰ পৰা হীনমন্যতা দূৰ কৰি তেওঁলোকৰ মাজত আত্মবিশ্বাস জগাই তোলাটোৱেই হ’ল প্ৰধানমন্ত্ৰীৰ বিগত ১০ বছৰৰ আটাইতকৈ ডাঙৰ কৃতিত্ব।

গৃহমন্ত্ৰীগৰাকীৰ মতে, বহু বছৰীয়া দাসত্বৰ ফলত দেশবাসীৰ মনত যি হীনমন্যতাৰ ভাব জন্ম হৈছিল, নৰেন্দ্ৰ মোদীয়ে তাক সম্পূৰ্ণৰূপে মচি পেলাইছে। তেওঁ উল্লেখ কৰে যে যি ব্যক্তিয়ে নিজেই কেতিয়াও হীনমন্যতাত ভোগা নাই, তেওঁহে এনে কাৰ্য সম্ভৱ কৰি তুলিব পাৰে।

শ্বাহে কয়, “২৯ খন দেশে এতিয়ালৈকে মোদীক তেওঁলোকৰ সৰ্বোচ্চ অসামৰিক সন্মান প্ৰদান কৰিছে। মই আন কোনো ৰাষ্ট্ৰপ্ৰধানৰ বিষয়ে নাজানো যিয়ে ইমান স্বীকৃতি লাভ কৰিছে।” তেওঁৰ মতে, বৰ্তমান বিদেশত ভাৰতীয়সকলৰ পৰিচয় মোদীৰ দেশৰ মানুহ হিচাপে অধিক প্ৰকট হৈ উঠিছে।

প্ৰধানমন্ত্ৰীৰ নেতৃত্বত দেশে অতিক্ৰম কৰা প্ৰত্যাহ্বানমূলক পদক্ষেপসমূহৰ খতিয়ান দি শ্বাহে কয় যে অযোধ্যাৰ ৰাম মন্দিৰ নিৰ্মাণ, ৩৭০ অনুচ্ছেদ বাতিল, তিনি তালাকৰ বিৰুদ্ধে আইন আৰু সন্ত্ৰাসবাদৰ বিৰুদ্ধে চাৰ্জিকেল ষ্ট্ৰাইকৰ দৰে কঠিন সিদ্ধান্ত মোদীৰ দৃঢ় ইচ্ছাৰ বাবেহে সম্ভৱ হ’ল। তেওঁ মোদীক এজন ‘মহান নেতা’ বুলি অভিহিত কৰি কয় যে শৈশৱত চৰম দৰিদ্ৰতা দেখিও তেওঁৰ মনত কোনো তিক্ততা জন্ম হোৱা নাছিল, বৰঞ্চ তেওঁ দুখীয়া লোকৰ কল্যাণৰ পথহে বাছি লৈছিল।

প্ৰধানমন্ত্ৰীৰ ব্যক্তিগত জীৱনৰ স্বচ্ছতাৰ ওপৰত আলোকপাত কৰি গৃহমন্ত্ৰীগৰাকীয়ে এক বিশেষ তথ্য সদৰী কৰে। তেওঁ কয় যে ইমান বছৰ ধৰি শাসনত থকাৰ পাছতো নৰেন্দ্ৰ মোদীৰ নামত নিজা ঘৰটো দূৰৰে কথা, এটা কোঠাও নাই। অথচ তেওঁ যোৱা ১০ বছৰত গৃহহীন লোকৰ বাবে ৪ কোটি ঘৰ সাজি দিছে।

শ্বাহৰ মতে, বিগত ১১ বছৰত প্ৰায় ২৭ কোটি লোকক দৰিদ্ৰতাৰ সীমাৰেখাৰ পৰা মুক্ত কৰাটো এক বিশ্ব অভিলেখ।

ইয়াৰ পূৰ্বে চহৰখনত আয়োজিত যুৱ ব্যৱসায়ী মহাসন্মিলনত অংশ লৈ শ্বাহে দেশৰ ষ্টাৰ্টআপ খণ্ডৰ উন্নয়নৰ তথ্য দাঙি ধৰে। তেওঁ কয় যে ২০১৪ চনত দেশত মাত্ৰ ৫০০ টা ষ্টাৰ্টআপ আছিল, যি সংখ্যা বৰ্তমান ২.০৬ লাখলৈ বৃদ্ধি পাইছে আৰু ইয়াৰ জৰিয়তে প্ৰায় ১৮ লাখ স্থায়ী কৰ্মসংস্থাপনৰ সৃষ্টি হৈছে। মোদীৰ নেতৃত্বত উদ্যোগীসকলৰ বাবে সুযোগৰ কোনো অভাৱ নাই বুলিও তেওঁ মন্তব্য কৰে।