ৰাৱালপিণ্ডিত জয়ৰে শ্ৰীলংকাৰ বিৰুদ্ধে এদিনীয়া শৃংখলা দখল পাকিস্তানৰ

ৰাৱালপিণ্ডিত অনুষ্ঠিত তৃতীয় এদিনীয়া খেলখনত পাকিস্তানে শ্ৰীলংকাক ৬ উইকেটত পৰাস্ত কৰি ৩-০ত শৃংখলা দখল কৰে। প্ৰথমখন মেচত ৬ ৰান আৰু দ্বিতীয়খন খেলত ৮ উইকেটত জয়লাভ কৰিছিল পাকিস্তানে। তৃতীয়খন মেচত শ্ৰীলংকাই ২১২ ৰানৰ লক্ষ্য নিৰ্ধাৰণ কৰিছিল, যিটো পাকিস্তানে ৫.২ অভাৰ বাকী থকা অৱস্থাত ফাখৰ জামান আৰু মহম্মদ ৰিজৱানৰ অৰ্ধশতকৰ সহায়ত অৰ্জন কৰে। টছত জয়ী হোৱাৰ পাছত পাকিস্তানে বলিং কৰিবলৈ বাছি লয়। শ্ৰীলংকাই ভাল আৰম্ভণি কৰে। প্ৰথম আঠ অভাৰত পাথুম নিছাংকা আৰু কামিল মিছাৰাই ৫০ ৰান অৰ্জন কৰে। নিছাংকা আউট হোৱাৰ পিছত ৰান ৰেট লেহেমীয়া হয়। কুছাল মেণ্ডিছ আৰু ছাদিৰা সমৰাৱিক্ৰামাই ৰান অৰ্জনত চেষ্টা কৰে যদিও বিফল হয়। বাওঁহাতৰ স্পিনাৰ ফৈছাল আক্ৰমে ধাৰাবাহিকভাৱে চাপ প্ৰয়োগ কৰি দুটা উইকেট দখল কৰে। পৱন ৰত্নায়কে ৩২ ৰানেৰে দলটোক স্থিৰ কৰি ৰখাৰ বিপৰীতে সমৰাৱিক্ৰামাই ৪৮ ৰানেৰে সৰ্বাধিক স্ক’ৰ কৰে।

শ্ৰীলংকাই ২১১ ৰানত অল আউট হয়। ৱাছিমে ১০ অভাৰত বলিং কৰি ৪৭ ৰানত ৩টা উইকেট দখল কৰে। তেওঁৰ ইকনমি হাৰ আছিল ৪.৭০। শ্বাহীন আফ্ৰিদীয়ে ৭.২ অভাৰত বলিং কৰি এটা মেডেন অভাৰ দি ৩৬ ৰানত এটা উইকেট দখল কৰে। তেওঁৰ ইকনমি হাৰ আছিল ৪.৯০। হাৰিছ ৰাউফে ৯ অভাৰত বলিং কৰি এটা মেডেন অভাৰৰ সৈতে ৩৮ ৰানত দুটা উইকেট দখল কৰে। ফৈছাল আক্ৰমে ১০ অভাৰত বলিং কৰি ৪২ ৰানত ২ উইকেট দখল কৰে। ৯ অভাৰত ৪৩ ৰানত ১ উইকেট দখল কৰে ফাহীম আশ্ৰফে। আনহাতে, লক্ষ্য অনুসৰণ কৰি পাকিস্তানে লেহেমীয়া আৰম্ভণি কৰে। সোনকালে হাচিবুল্লাহ আউট হয় যদিও ফাখৰ জামানে দ্ৰুত প্ৰদৰ্শনৰে দলটোক স্থিৰ কৰি তুলিছিল। জেফ্ৰি ভাণ্ডাৰছেই শ্ৰীলংকাক পুনৰ মেচখনলৈ আনিবলৈ চেষ্টা কৰিছিল। তেওঁ এটা সুন্দৰ কেচেৰে ফখৰ জামানক আউট কৰে আৰু তাৰ পাছত বাবৰ আজমক আউট কৰে। তাৰ পিছৰ অভাৰটোত ছলমান আঘাও এল বি ডব্লিউত আউট হয়।

ফখৰে ৪৫টা বলৰ মুখামুখি হৈ ৫৫ ৰান সংগ্ৰহ কৰি ৮টা চাৰি ৰান কৰে। তেওঁৰ ষ্ট্ৰাইক ৰেট আছিল ১২২.২২। এদিনীয়া কেৰিয়াৰৰ এয়া আছিল তেওঁৰ ১৯ সংখ্যক অৰ্ধশতক। এটা সময়ত পাকিস্তানক আৰু ৯৭ ৰানৰ প্ৰয়োজন হৈছিল। কিন্তু মহম্মদ ৰিজৱান আৰু হুছেইন তালাটে সংযমেৰে বেটিং কৰি মেচখন নিয়ন্ত্ৰণত ৰাখিছিল। দুয়োজনে কোনো ৰিস্ক নোলোৱাকৈ ৰান সংগ্ৰহ কৰি দলটোক লক্ষ্যলৈ লৈ যায়। ৰিজৱানে সম্পূৰ্ণ কৰিলে নিজৰ অৰ্ধশতক। ৰিজৱানে ৯২টা বলৰ মুখামুখি হৈ ৬১ ৰান সংগ্ৰহ কৰে। তেওঁৰ ষ্ট্ৰাইক ৰেট আছিল ৬৬.৩০। এয়া আছিল তেওঁৰ এদিনীয়া কেৰিয়াৰৰ ১৯ সংখ্যক অৰ্ধশতিকা। শ্ৰীলংকাৰ বিৰুদ্ধে চতুৰ্থটো অৰ্ধশতক অৰ্জন কৰে। ৰিজৱানে নিজৰ ১০০ সংখ্যক এদিনীয়া মেচ খেলিছিল।