ইন-স্পেচক স্বীকৃতি প্ৰদানকাৰী সংস্থা হিচাপে অনুমোদন এনচিভিইটিৰ

ভাৰত চৰকাৰৰ দক্ষতা বিকাশ তথা উদ্যমিতা মন্ত্ৰালয়(এমএছডিই)ৰ ৰাষ্ট্ৰীয় বৃত্তিমূলক শিক্ষা তথা প্ৰশিক্ষণ পৰিষদ(এনচিভিইটি)-এ এক যুগান্তকাৰী পদক্ষেপ ৰূপে ইণ্ডিয়ান নেচনেল স্পেচ প্ৰমচন এণ্ড অথৰাইজেচন চেণ্টাৰ(ইন-স্পেচ)ক এক স্বীকৃতি প্ৰদানকাৰী সংস্থা (দ্বৈত) হিচাপে আনুষ্ঠানিকভাৱে ঘোষণা কৰিছে। মহাকাশ খণ্ডত বৃত্তিমূলক শিক্ষা আৰু প্ৰশিক্ষণৰ দৃশ্যপট শক্তিশালী কৰাৰ লক্ষ্যৰে এমএছডিইৰ সচিব আৰু এনচিভিইটিৰ অধ্যক্ষ অতুল কুমাৰ তিৱাৰীৰ উপস্থিতিত এই চুক্তি স্বাক্ষৰিত হয়।

বৃত্তিমূলক শিক্ষা আৰু প্ৰশিক্ষণৰ ৰাষ্ট্ৰীয় নিয়ন্ত্ৰক হিচাপে সেৱা আগবঢ়োৱা এনচিভিইটিয়ে মানদণ্ড নিৰ্ধাৰণ, নিয়মাৱলী বিকাশ আৰু সমগ্ৰ দেশত দক্ষতাকেন্দ্ৰিক পদক্ষেপৰ মানদণ্ড আৰু ফলাফল উন্নত কৰাত এক গুৰুত্বপূৰ্ণ ভূমিকা পালন কৰি আহিছে। এমএছডিইৰ সচিব তথা এনচিভিইটিৰ অধ্যক্ষ অতুল কুমাৰ তিৱাৰীয়ে ভাৰতৰ মহাকাশ খণ্ডত দক্ষ কৰ্মশক্তিৰ ক্ৰমবৰ্ধমান প্ৰয়োজনীয়তাৰ ওপৰত গুৰুত্ব আৰোপ কৰে।

অতুল কুমাৰ তিৱাৰীয়ে কয় যে, ‘যিহেতু ভাৰতে নিজৰ মহাকাশ অন্বেষণ ক্ষমতা ক্ৰমান্বয়ে বৃদ্ধি কৰিছে আৰু শেহতীয়া অত্যাধুনিক প্ৰযুক্তিসমূহক একত্ৰিত কৰিছে, সেয়েহে এক উচ্চ দক্ষতাসম্পন্ন প্ৰতিভাৰ পুল গঢ়ি তোলাটো অতি গুৰুত্বপূৰ্ণ হৈ পৰিছে।’ এই চুক্তি স্বাক্ষৰ কৰাৰ সময়ত সংস্থাটোক প্ৰতিনিধিত্ব কৰে ইন-স্পেচৰ প্ৰমচন সঞ্চালকালয়ৰ সঞ্চালক ড০ বিনোদ কুমাৰে। সঞ্চালকজনে এই স্বীকৃতিক লৈ নিজৰ উৎসাহ প্ৰকাশ কৰি কয় যে, “ভাৰতৰ দ্ৰুতগতিত বৰ্ধিত মহাকাশ খণ্ডৰ বাবে এক দক্ষ কৰ্মশক্তি গঢ়ি তোলাৰ আমাৰ প্ৰচেষ্টাৰ এই স্বীকৃতিয়ে এক উল্লেখযোগ্য মাইলৰ খুঁটি হিচাপে চিহ্নিত কৰিছে।”