মেঘালয়ৰ বিদ্ৰোহী গোট এইচএনএলচিক নিষিদ্ধ কৰিলে কেন্দ্ৰীয় চৰকাৰে

কেন্দ্ৰীয় চৰকাৰে বৃহস্পতিবাৰে মেঘালয়স্থিত বিদ্ৰোহী গোট হাইনিভট্ৰেপ নেচনেল লিবাৰেচন কাউন্সিলক (এইচএনএলচি) হিংসাত লিপ্ত হোৱা আৰু ভাৰতৰ সাৰ্বভৌমত্ব আৰু অখণ্ডতাৰ বিপৰীতে কাৰ্যকলাপ চলোৱাৰ বাবে পাঁচ বছৰৰ বাবে নিষিদ্ধ সংগঠন হিচাপে ঘোষণা কৰে।

এক জাননীত কেন্দ্ৰীয় গৃহ মন্ত্ৰালয়ে কয় যে কেন্দ্ৰীয় চৰকাৰৰ অভিমত হৈছে যে এইচএনএলচিয়ে মেঘালয়ৰ অঞ্চলসমূহ পৃথকীকৰণৰ লক্ষ্য ঘোষণা কৰিছে য’ত মুখ্যতঃ খাচী আৰু জৈন্তিয়া জনজাতি বাস কৰে আৰু  সংগঠনৰ বাবে পুঁজি সংগ্ৰহ কৰিবলৈ নাগৰিকসকলক ভয় খুৱাই আহিছে।

লগতে কোৱা হৈছে যে সংগঠনটোৱে উত্তৰ-পূবৰ অন্যান্য বিদ্ৰোহী গোটসমূহৰ সৈতেও ধন দাবী আৰু ভাবুকিৰ বাবে সম্পৰ্ক বজাই ৰাখিছে আৰু ৪৮ টা অপৰাধমূলক গোচৰত জড়িত হৈ আছে, যাৰ ভিতৰত আছে ২০১৯ চনৰ নৱেম্বৰ মাহৰ পৰা ২০২৪ চনৰ জুন লৈকে মেঘালয়ত বিস্ফোৰণ সংগঠিত কৰা কেইবাটাও গোচৰ।