গান্ধীৰ নামত মেগা প্ৰকল্প: তেলেংগানাৰ সৰ্বোচ্চ প্ৰতিমূৰ্তি নিৰ্মাণ প্ৰস্তাৱক লৈ সমালোচনাৰ ধুমুহা

মুচি নদীৰ পাৰত জাতিৰ পিতা মহাত্মা গান্ধীৰ দেশৰ সৰ্বোচ্চ প্ৰতিমূৰ্তি নিৰ্মাণৰ বাবে তেলেংগানা চৰকাৰে গ্ৰহণ কৰা এক অভিলাষী প্ৰকল্পই এতিয়া তীব্ৰ ৰাজনৈতিক বিতৰ্কৰ সৃষ্টি কৰাৰ লগতে জনসাধাৰণৰ মাজতো উদ্বেগ বৃদ্ধি কৰিছে। প্ৰায় ৫,০০০ কোটি টকা ব্যয় সাপেক্ষ এই মূৰ্তিটো মুচি নদীৰ সৌন্দৰ্যবৰ্ধন প্ৰকল্পৰ অংশ হিচাপে নিৰ্মাণ কৰাৰ পৰিকল্পনা কৰা হৈছে। ইচি আৰু মুচি নদীৰ সংগমস্থলত নিৰ্মাণ হ’বলগীয়া এই প্ৰকল্পটোক লৈ বৰ্তমান পৰিৱেশ কৰ্মী আৰু বিৰোধী দলসমূহে চৰকাৰৰ বিৰুদ্ধে সৰৱ হৈ পৰিছে।

প্ৰায় ১০ একৰ মাটিত নিৰ্মাণ হ’বলগীয়া এই বিশাল প্ৰকল্পটোৰ বাবে চৰকাৰে ইতিমধ্যে ভূমি অধিগ্ৰহণৰ জাননী জাৰি কৰিছে। সমগ্ৰ মুচি নদীৰ উন্নয়ন পৰিকল্পনাৰ বাবে প্ৰায় ৩,২৭৯ একৰ ভূমিৰ প্ৰয়োজন হ’ব, যাৰ ফলত প্ৰায় ১০,০১৭ টা বাসগৃহ আৰু বাণিজ্যিক প্ৰতিষ্ঠান প্ৰভাৱিত হোৱাৰ সম্ভাৱনা আছে। বিশেষকৈ মধু পাৰ্ক ৰিজ এপাৰ্টমেণ্ট কমপ্লেক্সত বাস কৰা প্ৰায় ৫০০ টা পৰিয়াল এতিয়া গৃহহীন হোৱাৰ আশংকাত দিন অতিবাহিত কৰিছে।

বিৰোধী দলসমূহে চৰকাৰৰ আৰ্থিক অগ্ৰাধিকাৰক লৈ প্ৰশ্ন উত্থাপন কৰি অভিযোগ কৰিছে যে জনকল্যাণমূলক আঁচনিৰ বাবে পুঁজিৰ অভাৱৰ কথা দোহাই দিয়া চৰকাৰে এনে বিলাসী প্ৰকল্পত বৃহৎ পৰিমাণৰ ৰাজহুৱা ধন খৰচ কৰিব বিচাৰিছে। কৃষকৰ বাবে বাকী থকা সাহায্য আৰু সামাজিক আঁচনিসমূহৰ পৰিৱৰ্তে এই মূৰ্তি নিৰ্মাণৰ প্ৰস্তুতি চলোৱা কাৰ্যই তেলেংগানাৰ ৰাজনীতিত এতিয়া এক নতুন সংঘাতৰ সূচনা কৰিছে।