মহাৰাষ্ট্ৰৰ ৫ হাজাৰৰো অধিক মহিলা কৃষকক সবলীকৰণৰ বাবে গডৰেজ এগ্ৰ’ভেট এম এছ আৰ এল এমৰ অংশীদাৰ

গড্ৰেজ এগ্ৰ’ভেট লিমিটেডে মহাৰাষ্ট্ৰৰ ৯খন প্ৰধান কপাহ উৎপাদনকাৰী জিলাৰ ৫,০০০ৰো অধিক মহিলা কৃষকৰ সবলীকৰণৰ বাবে মহাৰাষ্ট্ৰ ৰাজ্যিক গ্ৰাম্য জীৱিকা অভিযান(এমএছআৰএলএম-ইউএমইডি)ৰ সৈতে তিনি বছৰীয়া অংশীদাৰিত্বৰ কথা সোমবাৰে ঘোষণা কৰিছে। ৰাষ্ট্ৰসংঘই ২০২৬ চনক মহিলা কৃষকৰ আন্তঃৰাষ্ট্ৰীয় বৰ্ষ হিচাপে ঘোষণা কৰাৰ সময়ছোৱাত এই সহযোগিতা আগবঢ়াইছে, য’ত কৃষিক্ষেত্ৰত মহিলাৰ ভূমিকা শক্তিশালী কৰা আৰু গ্ৰাম্য জীৱিকাৰ উন্নতিৰ ওপৰত গুৰুত্ব আৰোপ কৰা হৈছে। ১৯ জানুৱাৰীত স্বাক্ষৰিত বুজাবুজিৰ চুক্তিৰ অধীনত গড্ৰেজ এগ্ৰ’ভেট লিমিটেডে মহাৰাষ্ট্ৰ ৰাজ্যিক গ্ৰাম্য জীৱিকা অভিযানৰ সৈতে ঘনিষ্ঠভাৱে কাম কৰি মহিলা কৃষকসকলৰ মাজত উন্নত কৃষি পদ্ধতি আৰু সংহত কীট ব্যৱস্থাপনাক প্ৰসাৰিত কৰিব। প্ৰথম বছৰত এই কাৰ্যসূচীয়ে নাগপুৰ, অমৰাৱতী, য়ৱটমল, ৱাছিম, পাৰৱনি, জলগাঁও, বীড়, আকোলা আৰু নান্দেড় জিলাক সামৰি ৫০,০০০ একৰতকৈও অধিক ভূমিত ৫,০০০ৰো অধিক কৃষকৰ কাষ চাপিব আৰু প্ৰতিখন জিলাৰ ১০০টা আত্মসহায়ক গোটক এই ক্ষেত্ৰত জড়িত কৰিব।

এই পদক্ষেপৰ ভিতৰত আছে প্ৰশিক্ষণ কৰ্মশালা, কৃষক ক্ষেত্ৰ বিদ্যালয়, প্ৰদৰ্শন প্লট আৰু সুৰক্ষা কিট বিতৰণ আদি।  গড্ৰেজ এগ্ৰ’ভেটে এই পদক্ষেপৰ বাবে পুঁজিৰ যোগান ধৰিব আৰু কাৰ্যকৰী কৰিব, আনহাতে, এমএছআৰএলএম-ইউএমইডিয়ে নিজৰ আত্মসহায়ক গোট আৰু কৃষি সখী নেটৱৰ্কৰ জৰিয়তে সংগঠনটোক সহায় কৰিব। অনুষ্ঠানত ভাষণ প্ৰদান কৰি এমএছআৰএলএম-ইউএমইডিৰ মুখ্য কাৰ্যবাহী বিষয়া নীলেশ সাগৰে কয় যে, এই অংশীদাৰিত্বই মহিলা কৃষকসকলক বৈজ্ঞানিক শস্য ব্যৱস্থাপনা পদ্ধতি গ্ৰহণ কৰা আৰু আৰ্থ-সামাজিক অৱস্থা উন্নত কৰাত সহায় কৰিব।  গড্ৰেজ এগ্ৰ’ভেটৰ চিইঅ’ আৰু এমডি সুনীল কাটাৰিয়াই কয় যে, ভাৰতীয় কৃষিক্ষেত্ৰত বহনক্ষম আৰু সামগ্ৰিক বিকাশৰ লক্ষ্যত উপনীত হ’বলৈ মহিলা কৃষকৰ সবলীকৰণ অতি গুৰুত্বপূৰ্ণ।

গুৱাহাটীৰ কৃষি বাণিজ্য চক্ৰই প্ৰকাশ কৰা অনুসৰি মহাৰাষ্ট্ৰৰ দৰে প্ৰধান উৎপাদনকাৰী ৰাজ্যত কপাহৰ উৎপাদনশীলতা আৰু মানদণ্ড উন্নত কৰা পদক্ষেপসমূহে পূব ভাৰত আৰু উত্তৰ-পূৰ্বাঞ্চলৰ বজাৰসমূহত ইতিবাচক প্ৰভাৱ পেলাব পাৰে।  উন্নত উৎপাদন আৰু স্থিৰ মানদণ্ডই মসৃণ যোগান শৃংখল আৰু অধিক স্থিৰ মূল্য নিৰ্ধাৰণত সহায় কৰিব বুলি আশা কৰা হৈছে, যি দীৰ্ঘম্যাদীভাৱে গুৱাহাটীৰ দৰে কেন্দ্ৰত ব্যৱসায়ী আৰু নিম্নধাৰাৰ টেক্সটাইলকেন্দ্ৰিক ব্যৱসায়সমূহক উপকৃত কৰিব।