বৈষ্ণো দেৱীত ভূমিস্খলনত মৃতকৰ সংখ্যা ৩২ লৈ বৃদ্ধি

বৈষ্ণো দেৱীত ভূমিস্খলনত মৃতকৰ সংখ্যা ৩২ লৈ বৃদ্ধি পাইছে, কাৰণ উদ্ধাৰকাৰীয়ে ধ্বংসাৱশেষৰ পৰা আৰু অধিক মৃতদেহ উদ্ধাৰ কৰিছে। জম্মু-কাশ্মীৰৰ ৰিয়াছি জিলাৰ পাহাৰীয়া অঞ্চলত অৱস্থিত বৈষ্ণো দেৱী মন্দিৰলৈ যোৱা পথত এদিন পূৰ্বে ভূমিস্খলন সংঘটিত হয়। বিষয়াসকলে জনোৱা মতে, ধাৰাবাহিক আৰু ধাৰাসাৰ বৰষুণৰ ফলত হোৱা ভূমিস্খলনত কমেও ২০ জন লোক আহত হয়, যিসকলক বিভিন্ন চিকিৎসালয়ত চিকিৎসাধীন হৈ আছে।

ধ্বংসাৱশেষত অধিক লোক আবদ্ধ হৈ পৰাৰ আশংকা হোৱাত উদ্ধাৰকাৰী দলে অভিযান অব্যাহত ৰাখিছে। ধ্বংসাৱশেষৰ পৰা ৩০টা মৃতদেহ উদ্ধাৰ হোৱাৰ বিপৰীতে দুজন আহত লোকৰ চিকিৎসালয়ত মৃত্যু হয়। মঙলবাৰে বিয়লি প্ৰায় ৩ বজাত ভূমিস্খলনৰ ফলত পাহাৰৰ ঢালৰ পৰা শিল, মাটি খহি পৰে। এই ঘটনাৰ পিছতে বৈষ্ণো দেৱী মন্দিৰৰ তীৰ্থযাত্ৰা স্থগিত ৰখা হয়।

প্ৰধানমন্ত্ৰী নৰেন্দ্ৰ মোদীয়ে কয় যে তেওঁ সকলোৰে সুৰক্ষা আৰু মংগলৰ বাবে প্ৰাৰ্থনা কৰিছে। ছ’চিয়েল মিডিয়া প্লেটফৰ্ম ‘এক্স’ত এটা পোষ্টত তেওঁ কয়-শ্ৰী মাতা বৈষ্ণো দেৱী মন্দিৰলৈ যোৱা পথত ভূমিস্খলনৰ ফলত প্ৰাণ হেৰুৱাৰ খবৰটো দুখজনক। শোকসন্তপ্ত পৰিয়ালসমূহৰ সৈতে মোৰ সমবেদনা। আহতসকলৰ আশু আৰোগ্য কামনা কৰিলোঁ। প্ৰশাসনে ক্ষতিগ্ৰস্ত সকলোকে সহায় কৰি আছে।