ভাৰতীয় ফুটবল কেলেণ্ডাৰৰ পৰা আঁতৰিল আইএছএল

ভাৰতীয় ফুটবলৰ ২০২৫-২৬ ছিজনৰ বাবে সৰ্বভাৰতীয় ফুটবল ফেডাৰেচনে প্ৰকাশ কৰা প্ৰতিযোগিতাৰ কেলেণ্ডাৰত এক বৃহৎ পৰিৱৰ্তন দেখা গৈছে। দেশৰ শীৰ্ষ পুৰুষ ফুটবল লীগ হিচাপে বিবেচিত ইণ্ডিয়ান ছুপাৰ লীগক এইবাৰৰ সূচীৰ পৰা সম্পূৰ্ণৰূপে আঁতৰাই দিয়া হৈছে। ২০১৪ চনত ফ্ৰেঞ্চাইজি লীগ হিচাপে আৰম্ভ হোৱা আই এছ এল ২০১৯ চনত ভাৰতৰ শীৰ্ষ লীগলৈ উন্নীত হয়। ইয়াৰ মাষ্টাৰ ৰাইটছ এগ্ৰিমেণ্ট (এম আৰ এ)ৰ ম্যাদ ডিচেম্বৰ মাহত শেষ হ’ব আৰু ইয়াৰ নবীকৰণৰ ক্ষেত্ৰত এতিয়াও কোনো সিদ্ধান্ত লোৱা হোৱা নাই। ২০২৫ চনৰ এপ্ৰিল মাহত এ আই এফ এফৰ কাৰ্যবাহী সমিতিয়ে এফ এছ ডি এলৰ সৈতে এম আৰ এৰ ভৱিষ্যতৰ বিষয়ে আলোচনা কৰিবলৈ আঠজনীয়া টাস্ক ফ’ৰ্চ গঠন কৰে। কিন্তু এই বিষয়ত এতিয়ালৈকে কোনো সুনিৰ্দিষ্ট সিদ্ধান্ত লোৱা হোৱা নাই, যাৰ বাবে লীগৰ সৈতে জড়িত ক্লাবসমূহো আগন্তুক ছিজনৰ বিষয়ে অনিশ্চয়তাত পৰিছে। লীগৰ সময়সীমা পূৰণ কৰিব নোৱাৰাৰ বাবে আই এছ এলক সূচীৰ পৰা আঁতৰাই অনাটোৱে কেইবাটাও ক্লাবৰ ট্ৰেন্সফাৰ পৰিকল্পনাত প্ৰভাৱ পেলাইছে। ইয়াৰ বাবেই খেলুৱৈ ক্ৰয়-বিক্ৰয় আৰু দল গঠন প্ৰক্ৰিয়া স্তব্ধ হৈ পৰিছে।

২০২৫-২৬ বৰ্ষৰ ছিজন ১৫ জুলাইত ডুৰাণ্ড কাপৰ জৰিয়তে আৰম্ভ হ’ব, তাৰ পিছত ১ ছেপ্টেম্বৰৰ পৰা ছুপাৰ কাপ অনুষ্ঠিত হ’ব।বিশেষ কথাটো হ’ল এতিয়া আই এছ এলৰ পিছত নহয়, আই এছ এল অবিহনে ছিজনৰ মাজভাগত ছুপাৰ কাপ অনুষ্ঠিত হ’ব।এআইএফএফৰ এই সিদ্ধান্তৰ আঁৰৰ এটা ডাঙৰ কাৰণ হ’ল আই এছ এলৰ দৰ্শকৰ সংখ্যা কম আৰু জনপ্ৰিয়তা হ্ৰাস পোৱা বুলি ধাৰণা কৰা হৈছে। ইয়াৰ উপৰিও বহু ক্লাবে আই এছ এলত অংশগ্ৰহণ কৰিবলৈ ৰিজাৰ্ভ বা যুৱ দল পঠিয়াইছিল, যাৰ ফলত ই দ্বিতীয় স্তৰৰ প্ৰতিযোগিতা হিচাপে পৰিগণিত হৈছিল।সৰ্বভাৰতীয় ফুটবল ফেডাৰেচনে ২০২৫-২৬ ছিজনৰ প্ৰতিযোগিতাৰ সূচী প্ৰকাশ কৰিছে। জুনিয়ৰ বয় আৰু গাৰ্লছ শাখাৰ (টিয়াৰ ১ আৰু ২) প্ৰতিযোগিতা ২০২৫ চনৰ ১০ জুলাইৰ পৰা আৰম্ভ হ’ব আৰু ২০২৫ চনৰ ৩১ জুলাইলৈকে চলিব। ইফালে, ২০২৫ চনৰ ১৫ জুলাইৰ পৰা ২৩ আগষ্টলৈকে অনুষ্ঠিত হ’ব সন্মানীয় ডুৰাণ্ড কাপ। ২০২৫ চনৰ ১ ছেপ্টেম্বৰৰ পৰা ২০ ছেপ্টেম্বৰৰ ভিতৰত ছুপাৰ কাপ (বা ফেডাৰেচন কাপ) আৰু ছিনিয়ৰ মহিলা গ্ৰুপ ষ্টেজ দুয়োটা খেল অনুষ্ঠিত হ’ব।

২০২৫ চনৰ ১ ছেপ্টেম্বৰৰ পৰা আৰম্ভ হ’ব এআইএফএফ এলিট ইউথ লীগ (অনূৰ্ধ্ব-১৪, ১৬, আৰু অনূৰ্ধ্ব-১৮) আৰু ২০২৬ চনৰ ৩১ মে’লৈকে চলিব। ২০২৫ চনৰ ১৯ ​​অক্টোবৰৰ পৰা আৰম্ভ হোৱা আই লীগ ২০২৬ চনৰ ৩০ এপ্ৰিললৈকে চলিব আৰু ইণ্ডিয়ান মহিলা লীগ (আই ডব্লিউ এল)ও ২০২৫ চনৰ ২৫ অক্টোবৰৰ পৰা ২০২৬ চনৰ ৩০ এপ্ৰিললৈকে অনুষ্ঠিত হ’ব। ২০২৫ চনৰ ৫ ডিচেম্বৰৰ পৰা ২০ ডিচেম্বৰলৈ আৰু অন্তিম ৰাউণ্ড ২০২৬ চনৰ ১ৰ পৰা ২০ জানুৱাৰীলৈ অনুষ্ঠিত হ’ব।আই ডব্লিউ এল-২ (ভাৰতীয় মহিলা লীগ ২) ২০২৬ চনৰ ২৫ জানুৱাৰীৰ পৰা ৩০ এপ্ৰিললৈ অনুষ্ঠিত হ’ব। ইয়াৰ উপৰিও ২০২৬ চনৰ ১ৰ পৰা ১৫ ফেব্ৰুৱাৰীলৈ বিচ ছকাৰ চেম্পিয়নশ্বিপ, ২০২৬ চনৰ ১ৰ পৰা ২০ মে’লৈ ফুটবল ক্লাব চেম্পিয়নশ্বিপ, আৰু ২০২৬ চনৰ ১ এপ্ৰিলৰ পৰা ৩১ মে’লৈ স্বামী বিবেকানন্দ অনূৰ্ধ্ব ২০ চেম্পিয়নশ্বিপ অনুষ্ঠিত হ’ব।