নাগালেণ্ড চৰকাৰ -ইষ্টাৰ্ণ নাগালেণ্ড পিপলছ অৰ্গেনাইজেশ্যনৰ সৈতে ত্ৰিপাক্ষীক চুক্তি স্বাক্ষৰ গৃহমন্ত্ৰীৰ

ৰাজ্যৰ ভিতৰতে সীমান্ত নাগালেণ্ড টেৰিটৰিয়েল অথৰিটি গঠনৰ বাবে কেন্দ্ৰীয় চৰকাৰে বৃহস্পতিবাৰে নাগালেণ্ড চৰকাৰ আৰু ইষ্টাৰ্ণ নাগালেণ্ড পিপলছ অৰ্গেনাইজেশ্যনৰ সৈতে চুক্তি স্বাক্ষৰ কৰে। কেন্দ্ৰীয় গৃহমন্ত্ৰী অমিত শ্বাহৰ উপস্থিতিত এই ত্ৰিপাক্ষীক চুক্তি স্বাক্ষৰ কৰা হয়। স্বাক্ষৰ কৰি কেন্দ্ৰীয় গৃহমন্ত্ৰী অমিত শ্বাহে কয় যে পূব নাগালেণ্ডৰ উন্নয়নৰ বাবে সম্ভৱপৰ সকলো সাহায্য প্ৰদান কৰাৰ লগতে সকলো দায়িত্ব পালন কৰিব। শ্বাহে কয় যে এটা বা দুটা পইণ্টৰ বাহিৰে বাকী সকলো সমস্যা সমাধান হৈছে।

তেওঁ লগতে কয় যে ২০১৯ চনৰ পৰা আমি উত্তৰ-পূবত ১২খন গুৰুত্বপূৰ্ণ চুক্তিত স্বাক্ষৰ কৰিছো। গৃহমন্ত্ৰীগৰাকীয়ে কয়-আমি স্বাক্ষৰ কৰা চুক্তিসমূহ কাৰ্যকৰী কৰাৰ বাবে নৰেন্দ্ৰ মোদী চৰকাৰৰ সকলো প্ৰচেষ্টা চলোৱাটো পৰম্পৰা হৈ আহিছে। মই এনপিঅ’ৰ প্ৰতিনিধিসকলক আশ্বস্ত কৰিব বিচাৰো যে কেন্দ্ৰই পূব নাগালেণ্ডৰ উন্নয়নৰ বাবে সম্পূৰ্ণ সহায় আগবঢ়াব আৰু লগতে নিজৰ দায়িত্বও পালন কৰিব। তেওঁ কয় যে নাগালেণ্ড আৰু কেন্দ্ৰীয় চৰকাৰৰ সম্পৰ্কত কোনো সন্দেহ থাকিব নালাগে কিয়নো সকলো পুঁজি চূড়ান্ত কৰি তাৰ পিছত মুকলি কৰি দিয়া হ’ব।

মুখ্যমন্ত্ৰী নেইফিউ ৰিঅ’ই কয় যে এই চুক্তিখনে পাৰস্পৰিক আস্থা প্ৰতিফলিত কৰে, পূব নাগালেণ্ড আৰু সমগ্ৰ ৰাজ্যখনৰ আকাংক্ষা পূৰণ কৰে আৰু প্ৰতিটো ঘৰতে উন্নয়ন আনিবলৈ চেষ্টা কৰে। ৰাজ্যখনৰ ছয়খন পূব জিলাত বিস্তৃত আঠটা জনজাতিক প্ৰতিনিধিত্ব কৰা শীৰ্ষ সংস্থা এনপিঅ’ই ২০১০ চনৰ পৰাই দশক দশক ধৰি অৱহেলিত হোৱাৰ অভিযোগ উত্থাপন কৰি সুকীয়া ৰাজ্য গঠনৰ দাবী জনাই আহিছে।