বাংলাদেশত হিন্দু যুৱকক মৰিয়াই হত্যা! ভাৰত চৰকাৰলৈ বিশেষ আহ্বান প্ৰিয়ংকা গান্ধীৰ

বাংলাদেশত অলপতে এজন হিন্দু যুৱকক বৰ্বৰভাৱে মৰিয়াই হত্যা কৰি দেহটো জ্বলাই দিয়াৰ ঘটনাই এতিয়া আন্তঃৰাষ্ট্ৰীয় পৰ্যায়ত প্ৰতিক্ৰিয়াৰ সৃষ্টি কৰিছে। চুবুৰীয়া দেশখনত ধৰ্মীয় সংখ্যালঘুসকলৰ ওপৰত চলি থকা এই নিৰ্যাতনক লৈ কংগ্ৰেছ নেত্ৰী প্ৰিয়ংকা গান্ধী ভাদ্ৰাই গভীৰ উদ্বেগ প্ৰকাশ কৰে। তেওঁ এই ঘটনাক অত্যন্ত বিচলিত কৰা বুলি অভিহিত কৰি ভাৰত চৰকাৰক বাংলাদেশত থকা হিন্দু, খ্ৰীষ্টান আৰু বৌদ্ধ ধৰ্মৰ লোকসকলৰ সুৰক্ষাৰ বিষয়টো গুৰুত্বসহকাৰে তুলি ধৰিবলৈ আহ্বান জনায়।

প্ৰাপ্ত তথ্য অনুসৰি, ময়মনসিং চহৰত ২৫ বছৰীয়া দীপু চন্দ্ৰ দাস নামৰ এজন কাৰখানাৰ শ্ৰমিকক ধৰ্মনিন্দাৰ অভিযোগত এজাক উন্মত্ত জনতাই গছত ওলোমাই নিৰ্মমভাৱে হত্যা কৰে। হত্যাৰ পাছত যুৱকজনৰ মৃতদেহটো ঢাকা-ময়মনসিং হাইৱেৰ কাষত জ্বলাই দিয়া হয়, যাৰ ফলত পথছোৱাত যান-বাহন চলাচল ব্যাহত হৈ পৰে। এই সমগ্ৰ দৃশ্য ছচিয়েল মিডিয়াত ভাইৰেল হৈ পৰাৰ পিছতে অঞ্চলটোত তীব্ৰ উত্তেজনাৰ সৃষ্টি হৈছে।

ইফালে, বাংলাদেশৰ অন্তৱৰ্তীকালীন চৰকাৰে এই হত্যাকাণ্ডক গৰিহণা দি জনাইছে যে কোনো দোষীকেই সাৰি যাবলৈ দিয়া নহ’ব। চৰকাৰখনে এক বিবৃতিৰ জৰিয়তে দেশবাসীক হিংসা আৰু ঘৃণা ত্যাগ কৰিবলৈ আহ্বান জনাইছে। যোৱা বৰ্ষৰ আগষ্ট মাহত শ্বেখ হাছিনা চৰকাৰৰ পতনৰ পাছৰে পৰা বাংলাদেশত হিন্দু জনসংখ্যাৰ ওপৰত ধাৰাবাহিকভাৱে আক্ৰমণৰ ঘটনা বৃদ্ধি পাইছে, যিয়ে বৰ্তমানৰ পৰিস্থিতিক অধিক স্পৰ্শকাতৰ কৰি তুলিছে।