সোণাপুৰৰ হাতীমূৰাত নিৰলে শুই থকা স্বামীৰ কাষত বহি উচুপি উঠিল গৰিমা শইকীয়া গাৰ্গ

হঠাতে সোণাপুৰলৈ গৈ পৰিৱেশ দেখি অভিভূত হৈ পৰিল গৰিমা শইকীয়া গাৰ্গসহ জুবিনৰ আন ঘনিষ্ঠ লোকসকল ৷সোণাপুৰৰ জুবিন ক্ষেত্ৰত শুকুৰবাৰে মাজনিশা উপস্থিত হ’ল জনতাৰ শিল্পীজনাৰ মৰমৰ পত্নী গৰিমা শইকীয়া গাৰ্গ । স্বামীৰ অবৰ্তমানত সোণাপুৰৰ হাতীমূৰাত নিৰলে শুই থকা স্বামীৰ কাষত বহি উচুপি উঠিল গৰিমা শইকীয়া গাৰ্গ । চৌদিশে গুঞ্জৰিত মায়াবিনী শীৰ্ষক গীতত যেন জুবিনক্ষেত্ৰ হৈ পৰিল মায়াবিনীময়…প্ৰিয় মানুহজনৰ অবিহনে দিনবোৰ-ৰাতিবোৰ কিদৰে পাৰ কৰিছে তেওঁৰ বাহিৰে জানিব কোনে । অকল তেওঁৱেই নে, ৰাজ্যৰ কোটি কোটি জনতাৰো দেখোন একেই অৱস্থা । নাই চকুত টোপনি, মনে নামানে তেওঁৰ অনুপস্থিতি, মাজৰাতি হাহাকাৰ কৰি উঠে হৃদয়, নিদ্ৰাবিহীন প্ৰতিটো ৰাতি । সকলোৱে সমস্বৰে কৈছে, আমাক ন্যায় লাগে ন্যায় লাগে ।গৰিমাই কয়, “যেতিয়াই মোৰ জুবিনক কথা ক’বলৈ মন যাব, মই আহিম ৷ জুবিনে মনৰ কথা শুনিব, মোক আশীৰ্বাদ দিব, ম‌ই তেওঁক সকলো কম, তেওঁ শুনিব ৷ আপোনালোকে প্ৰাৰ্থনাত জুবিনক ৰাখক, মোক আশীৰ্বাদ কৰক ৷ জুবিনে বৰ অসমৰ সপোন দেখিছিল, সেই বৰ অসমখন আমি সকলোৱে মিলি গঢ়িব লাগিব ৷ এই জুবিন ক্ষেত্ৰখন সমন্বয় সম্প্ৰীতিৰ ক্ষেত্ৰ আমিয়েই কৰিব লাগিব ৷” এনেদৰে কৈ আবেগিক হৈ পৰিল গৰিমা ৷