অহা দুদিনলৈকে ৰাজ্যত অব্যাহত থাকিব কুঁৱলীৰ প্ৰকোপঃ নিম্নগামী তাপমাত্ৰা

সমগ্ৰ উত্তৰ-পূৰ্বাঞ্চলত শীতৰ প্ৰকোপ অব্যাহত থকাৰ মাজতে অহা ৭ জানুৱাৰীলৈকে ঘন কুঁৱলীৰ আগজাননী দিছে বতৰ বিজ্ঞান কেন্দ্ৰই। বিগত কিছুদিন ধৰি অসমৰ লগতে চুবুৰীয়া ৰাজ্যসমূহতো তীব্ৰ শীত অনুভৱ কৰা হৈছে। দেওবাৰে গুৱাহাটীত সৰ্বোচ্চ তাপমাত্ৰা ২২.৫ ডিগ্ৰী চেলচিয়াছ ৰেকৰ্ড কৰা হয়, যি স্বাভাৱিকতকৈ ১.৫ ডিগ্ৰী কম। ইফালে নিম্নতম তাপমাত্ৰা ১৪.৩ ডিগ্ৰী চেলচিয়াছত স্থিৰ আছে।

দিনৰ ভাগত ৰাজ্যৰ বিভিন্ন প্রান্তত তাপমাত্ৰাৰ ব্যাপক হ্ৰাস পৰিলক্ষিত হৈছে। ধুবুৰীত সৰ্বোচ্চ তাপমাত্ৰা স্বাভাৱিকতকৈ ৫.৯ ডিগ্ৰী হ্ৰাস পাই ১৫.৫ ডিগ্ৰী চেলচিয়াছ হয়। একেদৰে শিলচৰত ২১.৬ ডিগ্ৰী আৰু তেজপুৰত ২১.৪ ডিগ্ৰী চেলচিয়াছ তাপমাত্ৰা ৰেকৰ্ড কৰা হৈছে।

বতৰ বিজ্ঞানীসকলৰ মতে ভাৰত-গংগা সমভূমিৰ পৰা অহা কুঁৱলীৰ স্তৰ নামনি অসম অতিক্ৰম কৰি মধ্য অসমলৈ বিয়পি পৰিছে। এই ডাঠ কুঁৱলীৰ বাবে সূৰ্যৰ পোহৰত বাধাৰ সৃষ্টি হোৱাত দিনৰ তাপমাত্ৰা বৃদ্ধি পোৱা নাই।

উল্লেখ্য যে, যোৱা ডিচেম্বৰ মাহৰ শেষৰ সপ্তাহত গুৱাহাটীত একেৰাহে তিনিদিন ধৰি তাপমাত্ৰা ২০ ডিগ্ৰীৰ ওপৰলৈ যোৱা নাছিল। চলিত বৰ্ষৰ পহিলা জানুৱাৰীত মহানগৰীৰ সৰ্বনিম্ন তাপমাত্ৰা ১১ ডিগ্ৰী চেলচিয়াছলৈ হ্ৰাস পাইছিল।

মন কৰিবলগীয়া যে ১৯৬৪ চনৰ জানুৱাৰী মাহত গুৱাহাটীৰ সৰ্বকালৰ নিম্নতম তাপমাত্ৰা ৩ ডিগ্ৰী চেলচিয়াছ ৰেকৰ্ড কৰা হৈছিল। বৰ্তমান কুঁৱলীৰ বাবে দিনৰ ভাগত শীতৰ তীব্ৰতা বৃদ্ধি পালেও নিশাৰ তাপমাত্ৰা প্ৰায় স্বাভাৱিক অৱস্থাতে আছে।