২০৩১ৰ সংস্কৰণৰ পৰা মহিলা বিশ্বকাপত অংশগ্ৰহণ দলৰ সংখ্যা ৪৮লৈ বৃদ্ধিত অনুমোদন ফিফাৰ

ফিফা কাউন্সিলৰ বৈঠকৰ অন্তত শুকুৰবাৰে ফেডাৰেচন ইণ্টাৰনেশ্যনেল ডি ফুটবল এছ’চিয়েশ্যনে ঘোষণা কৰে যে তেওঁলোকে ২০৩১ চনৰ সংস্কৰণৰ পৰা মহিলা বিশ্বকাপত অংশগ্ৰহণ কৰা দলৰ সংখ্যা ৩২ৰ পৰা ৪৮লৈ বৃদ্ধি কৰাৰ সিদ্ধান্ত লৈছে। ভাৰ্চুৱেল বৈঠকত লোৱা এই সিদ্ধান্তই প্ৰতিনিধিত্ব যথেষ্ট বৃহৎ কৰিব, অধিক দেশ আৰু খেলুৱৈক শীৰ্ষ প্ৰতিযোগিতাত প্ৰৱেশৰ সুবিধা প্ৰদান কৰিব আৰু বিশ্বজুৰি মহিলা ফুটবলত বিনিয়োগ বৃদ্ধি কৰিব। ৪৮টা দলৰ ফিফা মহিলা বিশ্বকাপত ১২টা গ্ৰুপৰ ফৰ্মেট গ্ৰহণ কৰা হ’ব, মুঠ মেচৰ সংখ্যা ৬৪খনৰ পৰা ১০৪খনলৈ বৃদ্ধি পাব আৰু প্ৰতিযোগিতাখন এসপ্তাহ বৃদ্ধি কৰা হ’ব। ফিফা মহিলা বিশ্বকাপৰ ২০৩১ আৰু ২০৩৫ সংস্কৰণৰ বাবে আয়োজনৰ প্ৰয়োজনীয়তা সেই অনুসৰি খাপ খুৱাই লোৱা হৈছে।

ফিফাৰ সভাপতি জিয়ানি ইনফান্টিনোৱে কয় যে এইটো কেৱল ফিফা মহিলা বিশ্বকাপত আৰু ১৬টা দলে খেলাটোৱেই নহয়, বৰঞ্চ মহিলা ক্ৰীড়াৰ বাবে পৰৱৰ্তী পদক্ষেপ। যিয়ে নিশ্চিত কৰিব অধিক ফিফাৰ সদস্য সংস্থাই প্ৰতিযোগিতাখনৰ পৰা লাভৱান হোৱা আৰু তেওঁলোকৰ মহিলা ফুটবলৰ গাঁথনিসমূহ সামগ্ৰিক দৃষ্টিকোণৰ পৰা বিকশিত কৰাৰ। ফিফা মহিলা বিশ্বকাপ ২০২৩ৰ প্ৰথমটো বিশ্বকাপ, য’ত সকলো কনফেডাৰেচনৰ দলে কমেও এখন মেচত জয়লাভ কৰি পাঁচখন কনফেডাৰেচনৰ দলে নকআউট পৰ্যায়ত উপনীত হোৱাৰ লগতে আন বহুতো অভিলেখৰ লগতে বিশ্ব প্ৰতিযোগিতাৰ বাবে এক নতুন মানদণ্ড স্থাপন কৰে। তেওঁ কয় যে এই সিদ্ধান্তই আমি বিশ্বজুৰি মহিলা ফুটবলৰ বিকাশৰ গতি বজাই ৰখাটো নিশ্চিত কৰে।

পৰিষদে আফগান মহিলা ফুটবলৰ বাবে ফিফাৰ কৌশলত অনুমোদন জনায়, য’ত আফগান মহিলা শৰণাৰ্থী দল গঠনৰ কথা কল্পনা কৰা হৈছে আৰু প্ৰশাসনক ইয়াৰ কাৰ্য্যকলাপ সংগঠিত আৰু সহজ কৰি তুলিবলৈ নিৰ্দেশ দিয়া হৈছে, যাতে ইয়াৰ কাৰ্য্যকলাপ অতি সোনকালে আৰম্ভ কৰিব পৰা যায়। ফিফাৰ সভাপতিগৰাকীয়ে কয় যে, এইটো এক ঐতিহাসিক পদক্ষেপ। ফিফাই প্ৰতিগৰাকী ছোৱালীক ফুটবল খেলাৰ সুযোগ দিবলৈ প্ৰতিশ্ৰুতিবদ্ধ। ১৯৯১ চনত চীনত ১২টা দলৰ সৈতে ফিফা মহিলা বিশ্বকাপৰ প্ৰথম সংস্কৰণ অনুষ্ঠিত হৈছিল। ইয়াৰ পূৰ্বৰ সংস্কৰণত অষ্ট্ৰেলিয়া আৰু নিউজিলেণ্ডে আয়োজন কৰিছিল আৰু স্পেইনে খিতাপ দখল কৰিছিল। পৰৱৰ্তী সংস্কৰণ ২০২৭ চনত অনুষ্ঠিত হ’ব, আনহাতে আমেৰিকাই ২০৩১ চনৰ সংস্কৰণৰ আয়োজন কৰিব।