পুত্ৰহাৰা পৰিয়ালৰ মহানুভৱতাৰ নিদৰ্শন; মগজুৰ মৃত্যু হোৱা যুৱকৰ অংগদানে ৰক্ষা কৰিলে বহু জীৱন

সন্তানৰ অকাল বিয়োগত ম্ৰিয়মাণ হৈ পৰা এটা শোকাতুৰ পৰিয়ালে গ্ৰহণ কৰা এক বিৰল সিদ্ধান্তৰ বাবে এতিয়া কেইবাজনো ৰোগীলৈ কঢ়িয়াই আনিছে জীৱনৰ নতুন বতৰা। কৰ্ণাটকৰ মানড্যা জিলাৰ চিক্কা মানড্যা গাঁৱৰ দৰ্শন নামৰ এজন যুৱকৰ পথ দুৰ্ঘটনাত মগজুৰ মৃত্যু হোৱাৰ পাছত তেওঁৰ অংগসমূহ দান কৰাৰ বাবে পৰিয়ালে সন্মতি জনাইছে। বেংগালুৰুৰ ভিক্টোৰিয়া হাস্পতালৰ ট্ৰমা এণ্ড ইমাৰজেন্সি কেয়াৰ চেণ্টাৰত এই জটিল অংগ সংস্থাপন প্ৰক্ৰিয়াটো সফলভাৱে সম্পন্ন কৰা হৈছে।

ঘটনাৰ বিৱৰণি অনুসৰি, যোৱা ২২ ফেব্ৰুৱাৰীত দৰ্শন নামৰ যুৱকজন বাইকৰ পৰা পৰি আঘাতপ্ৰাপ্ত হৈছিল। প্ৰথম অৱস্থাত তেওঁ আঘাতটোক বিশেষ গুৰুত্ব নিদি ঘৰলৈ উভতি আহি শুই পৰিছিল যদিও পাছলৈ তেওঁৰ স্বাস্থ্যৰ দ্ৰুত অৱনতি ঘটে। হাস্পতালত ভৰ্তি কৰোৱাৰ পাছত চিকিৎসকসকলে তেওঁৰ মগজুত গুৰুতৰ আভ্যন্তৰীণ ৰক্তক্ষৰণ হোৱা বুলি ধৰা পেলায়। উন্নত চিকিৎসাৰ বাবে তেওঁক বেংগালুৰুৰ ভিক্টোৰিয়া হাস্পতালৰ টিইচিচিলৈ প্ৰেৰণ কৰা হয় যদিও দুদিনৰ নিৰন্তৰ প্ৰচেষ্টাৰ পাছতো তেওঁৰ মগজুৱে সঁহাৰি নিদিয়াত জ্যেষ্ঠ চিকিৎসকৰ এটা পেনেলে তেওঁক ‘ব্ৰেইন ডেড’ বুলি ঘোষণা কৰে।

হাস্পতালৰ চিকিৎসা অধীক্ষক ডাঃ দীপক আৰু বিশেষ বিষয়া ডাঃ আছিমা বানুৱে যুৱকজনৰ পৰিয়ালৰ এই মহানুভৱতাক প্ৰশংসা কৰিছে। ‘জীৱসাৰ্থকতে’ নামৰ অংগদানৰ সমন্বয়ক দলটোৰ সৈতে হোৱা আলোচনাৰ পাছত দৰ্শনৰ পৰিয়ালে অংগদানৰ বাবে মান্তি হয়। চিকিৎসকসকলে দৰ্শনৰ স্মৃতিত শ্ৰদ্ধা জনাই কয়, “গভীৰ শোকৰ মুহূৰ্ততো সমাজৰ কল্যাণৰ বাবে লোৱা এই সিদ্ধান্তই আন কেইবাজনো ব্যক্তিৰ জীৱন পোহৰাই তুলিছে।”

দৰ্শনৰ শৰীৰৰ পৰা যকৃত, বৃক্ক, হৃদযন্ত্ৰৰ ভালভ আৰু অন্যান্য গুৰুত্বপূৰ্ণ অংগসমূহ সংগ্ৰহ কৰি উপযুক্ত গ্ৰহণকাৰীৰ শৰীৰত সফলতাৰে সংস্থাপন কৰা হৈছে। বিএমচিআৰআই আৰু টিইচিচিৰ কৰ্মীবৃন্দৰ সহযোগত চৰকাৰী হাস্পতালখনতে সুলভ মূল্যত এই সমগ্ৰ প্ৰক্ৰিয়াটো সম্পূৰ্ণ কৰা হয়। এজন যুৱকৰ অকাল বিয়োগৰ পাছতো তেওঁৰ পৰিয়ালে দেখুওৱা এই ত্যাগে এতিয়া সমগ্ৰ ৰাজ্যখনতে চৰ্চা লাভ কৰিছে।