কংগ্ৰেছৰ জয়ৰ সপোন দেখাটো কেৱল এক ‘পাগলামি’; ৰাহুল গান্ধীক তীব্ৰ আক্ৰমণ মুখ্যমন্ত্ৰীৰ

বিৰোধীৰ জয়ৰ সপোনক কেৱল এক ‘পাগলামি’ বুলি অভিহিত কৰিলে মুখ্যমন্ত্ৰী হিমন্ত বিশ্ব শৰ্মাই। ৰাহুল গান্ধীক এজন ‘পাগল’ আখ্যা দি শনিবাৰে এক বিস্ফোৰক মন্তব্য কৰে মুখ্যমন্ত্ৰীগৰাকীয়ে। আগন্তুক বিধানসভা নিৰ্বাচনত কংগ্ৰেছ জয়ী হ’ব বুলি যিসকলে বিশ্বাস কৰিছে, তেওঁলোককো কঠোৰ ভাষাৰে সমালোচনা কৰে শৰ্মাই। যোৰহাটত ৰাহুল গান্ধীয়ে কৰা এক নিৰ্বাচনী প্ৰচাৰৰ পাছতেই বিজেপি আৰু কংগ্ৰেছৰ মাজত এই বাকযুদ্ধই এতিয়া চৰম সীমা পাইছে।

যোৰহাটৰ জনসভাত অংশ লৈ ৰাহুল গান্ধীয়ে প্ৰধানমন্ত্ৰী নৰেন্দ্ৰ মোদীৰ ওপৰত এক গুৰুতৰ অভিযোগ উত্থাপন কৰিছিল। প্ৰধানমন্ত্ৰী বিশ্বৰ একাংশ নেতাৰ দ্বাৰা প্ৰভাৱিত আৰু ঠিক একেদৰেই মোদীয়ে অসমৰ মুখ্যমন্ত্ৰীকো নিয়ন্ত্ৰণ কৰি আছে বুলি মন্তব্য কৰিছিল ৰাহুল গান্ধীয়ে। গান্ধীৰ এই মন্তব্যক সম্পূৰ্ণৰূপে নাকচ কৰি মুখ্যমন্ত্ৰী শৰ্মাই এয়া এজন ‘পাগল’ৰ প্ৰলাপ আখ্যা দিয়ে।

আনহাতে, অভিন্ন দেৱানী বিধি (ইউচিচি) সন্দৰ্ভত এক গুৰুত্বপূৰ্ণ স্পষ্টীকৰণ দিয়ে মুখ্যমন্ত্ৰীগৰাকীয়ে। তেওঁ কয়, “জনজাতীয় সম্প্ৰদায়সমূহক ইউ চি চিৰ আওতাৰ পৰা সম্পূৰ্ণৰূপে বাহিৰত ৰখা হ’ব।” অলপতে গোগামুখত প্ৰধানমন্ত্ৰী মোদীয়ে কৰা এক ঘোষণাৰ উদ্ধৃতি দি তেওঁ কয় যে জনজাতীয় পৰম্পৰা, ষষ্ঠ অনুসূচীভুক্ত অঞ্চল আৰু অসমৰ সাংস্কৃতিক পৰিচয় সুৰক্ষিত কৰিবলৈ চৰকাৰ প্ৰতিশ্ৰুতিবদ্ধ।

উল্লেখ্য যে অহা ৯ এপ্ৰিলত ৰাজ্যৰ ১২৬ খন আসনৰ বাবে অনুষ্ঠিত হ’ব বিধানসভা নিৰ্বাচন। ইউ চি চিৰ জৰিয়তে বিবাহ, বিবাহ বিচ্ছেদ আৰু উত্তৰাধিকাৰী সূত্ৰৰ দৰে ব্যক্তিগত আইনসমূহক এক উমৈহতীয়া আইনী কাঠামোৰে সলনি কৰাৰ লক্ষ্য লৈছে চৰকাৰে। ৪ মে’ত নিৰ্বাচনৰ ফলাফল ঘোষণা হ’বলগীয়া এই যুঁজত এতিয়া বিজেপি নেতৃত্বাধীন এন ডি এ আৰু কংগ্ৰেছৰ মাজত এক পোনপটীয়া প্ৰতিযোগিতাৰ সৃষ্টি হৈছে।