পেয়িং গেষ্ট আবাসত চিলিণ্ডাৰ বিস্ফোৰণ! কৰুণ মৃত্যু ছফটৱেৰ ইঞ্জিনিয়াৰৰ

বেংগালুৰুৰ কুন্দলাহাল্লিত অৱস্থিত এটা পেয়িং গেষ্ট আবাসত সোমবাৰে সন্ধিয়া এক ভয়ংকৰ বাণিজ্যিক গেছ চিলিণ্ডাৰ বিস্ফোৰণৰ ঘটনা সংঘটিত হয়। এই শোকাৱহ ঘটনাত ২৩ বছৰীয়া এজন ছফটৱেৰ পেছাদাৰী যুৱকৰ মৃত্যু হোৱাৰ বিপৰীতে আন তিনিগৰাকী আবাসিক গুৰুতৰভাৱে আহত হয়। আৰক্ষীৰ সূত্ৰই জনোৱা মতে, এইচ এ এল আৰক্ষী থানাৰ অন্তৰ্গত চেভেন হিলছ ছাই কো-লিভিং পিজিত সোমবাৰে সন্ধিয়া প্ৰায় ৬:১৫ বজাত এই বিস্ফোৰণ সংঘটিত হয়।

দুৰ্ঘটনাটোত প্ৰাণ হেৰুওৱা যুৱকজনক বেল্লাৰীৰ বাসিন্দা অৰবিন্দ বুলি চিনাক্ত কৰা হৈছে। তেওঁ কেপজেমিনি নামৰ আই টি কোম্পানীত এজন ছিনিয়ৰ এনালিষ্ট হিচাপে কৰ্মৰত আছিল। বিস্ফোৰণত আঘাতপ্ৰাপ্ত আন তিনিগৰাকী আৱাসিকক বৰ্তমান ব্ৰুকফিল্ড হাস্পতালত ভৰ্তি কৰোৱা হৈছে আৰু তাত তেওঁলোকৰ চিকিৎসা চলি আছে।

সাত মহলীয়া এই আৱাসিক ভৱনটোত মুঠ ৪৩টা কোঠা আছিল বুলি আৰক্ষীয়ে জানিবলৈ দিছে। ঘটনাৰ খবৰ পোৱাৰ লগে লগে অগ্নিনিৰ্বাপক বাহিনী আৰু জৰুৰীকালীন সেৱাৰ কৰ্মীসকলৰ লগতে স্থানীয় আৰক্ষী ঘটনাস্থলীত উপস্থিত হৈ উদ্ধাৰ অভিযান চলায়। প্ৰাথমিক তদন্তত ধৰা পৰিছে যে এটা বাণিজ্যিক শ্ৰেণীৰ গেছ চিলিণ্ডাৰৰ পৰাই এই বিস্ফোৰণৰ সূত্ৰপাত হৈছিল, যদিও কি পৰিস্থিতিত এই ঘটনা ঘটিল সেই বিষয়ে এতিয়াও নিশ্চিত হ’ব পৰা নাই। আৰক্ষীয়ে ইতিমধ্যে পিজি কৰ্তৃপক্ষৰ বিৰুদ্ধে এক গোচৰ ৰুজু কৰিছে আৰু সমগ্ৰ বিষয়টোৰ তদন্ত অব্যাহত ৰাখিছে।