কংগ্ৰেছৰ পৰিৱৰ্তন যাত্ৰাত শোনিতপুৰত উত্তপ্ত পৰিস্থিতি; বিজেপিৰ প্ৰতিবাদৰ সন্মুখত থমকি ৰ’ল গৌৰৱ গগৈৰ কনভয়

আগন্তুক ৰাজনৈতিক সমীকৰণৰ মাজতে কংগ্ৰেছৰ ৰাজ্যিক পৰ্যায়ৰ কাৰ্যসূচীয়ে আজি গ্ৰহণ কৰে এক ভয়াৱহ ৰূপ। অসম প্ৰদেশ কংগ্ৰেছ কমিটীৰ উদ্যোগত আয়োজিত ‘সময় পৰিৱৰ্তন যাত্ৰা’ই শোণিতপুৰ জিলাৰ বৰছলা সমষ্টিৰ বৰডুবিয়াত বিজেপিৰ তীব্ৰ বাধাৰ সন্মুখীন হোৱাত সমগ্ৰ অঞ্চলটোত এক উত্তপ্ত পৰিস্থিতিৰ সৃষ্টি হয়। জ্যেষ্ঠ কংগ্ৰেছ নেতা গৌৰৱ গগৈৰ নেতৃত্বত উলিওৱা এই যাত্ৰাক এশৰো অধিক বিজেপি কৰ্মীয়ে ৰাষ্ট্ৰীয় ঘাইপথ অৱৰোধ কৰি স্তব্ধ কৰি দিয়ে।

শনিবাৰে পুৱা প্ৰায় ১১ বজাত গৌৰৱ গগৈৰ কনভয়টো তেজপুৰৰ পৰা শিঙৰী অভিমুখে গৈ থকাৰ সময়তে বৰডুবিয়াত বিজেপি কৰ্মীসকলে তীব্ৰ প্ৰতিবাদ আৰম্ভ কৰে। প্ৰতিবাদকাৰীসকলে “গৌৰৱ গগৈ মুৰ্দাবাদ” আৰু “পাকিস্তানী এজেণ্ট গৌৰৱ গগৈ হুচিয়াৰ”ৰ দৰে অতি আক্ৰমণাত্মক শ্ল’গান দি পৰিৱেশ উত্তপ্ত কৰি তোলে। প্ৰত্যক্ষদৰ্শীৰ মতে, এই হুলস্থূলীয়া পৰিৱেশৰ মাজতে একাংশ প্ৰতিবাদকাৰীয়ে যাত্ৰাত অংশগ্ৰহণ কৰা কংগ্ৰেছ নেতা-কৰ্মীসকলক শাৰীৰিকভাৱে অপদস্থ কৰাৰো চেষ্টা চলায়।

যাত্ৰাটোত গৌৰৱ গগৈৰ লগতে প্ৰদেশ কংগ্ৰেছৰ সভাপতি ভূপেন বৰা, ৰকিবুল হুছেইন, মীৰা বৰঠাকুৰ আদিকে ধৰি কেইবাজনো জ্যেষ্ঠ নেতা উপস্থিত আছিল। বিজেপিৰ এই পথ অৱৰোধৰ ফলত ৰাষ্ট্ৰীয় ঘাইপথত যান-বাহন চলাচল সম্পূৰ্ণৰূপে বন্ধ হৈ পৰে, যাৰ ফলত সাধাৰণ যাত্ৰীসকলো চৰম অসুবিধাৰ সন্মুখীন হয়। কংগ্ৰেছ নেতৃত্বই অভিযোগ কৰি কয়, “এক শান্তিপূৰ্ণ আৰু জনসম্পৰ্কীয় কাৰ্যসূচীক বাধা দিবলৈ এইয়া এক ৰাজনৈতিক অভিসন্ধি।”

উল্লেখ্য যে, ৰাজ্যৰ বিভিন্ন মঠ-মন্দিৰ, সত্ৰ আৰু শ্বহীদ বেদীসমূহ দৰ্শন কৰি জনসাধাৰণৰ সৈতে সংযোগ স্থাপনৰ লক্ষ্যৰে কংগ্ৰেছে এই যাত্ৰা আৰম্ভ কৰিছিল। জ্যেষ্ঠ কংগ্ৰেছ নেতাসকলে এই হিংসাত্মক আৰু ভাবুকিপূৰ্ণ আচৰণক গৰিহণা দি কয়, “গণতান্ত্ৰিক কাৰ্যসূচীক এনেদৰে ভাবুকিৰে বন্ধ কৰিব খোজা কাৰ্য অতি নিন্দনীয়।”