ইহুদী অনুষ্ঠানত ৰক্তক্ষয়ী আক্ৰমণঃ অষ্ট্ৰেলিয়াত নিৰ্বিচাৰ গুলীবৰ্ষণ, আক্ৰমণকাৰীসহ ১৬ জনৰ মৃত্যু

অষ্ট্ৰেলিয়াৰ চিডনীৰ বণ্ডি বীচ্চত দেওবাৰে নিশা সংঘটিত হোৱা ৰক্তক্ষয়ী গুলীচালনাৰ ঘটনাই বিশ্বজুৰি তীব্ৰ প্ৰতিক্ৰিয়াৰ সৃষ্টি কৰিছে। আৰক্ষীয়ে সোমবাৰে জানিবলৈ দিয়ে যে এই আক্ৰমণ সংঘটিত কৰা দুজন বন্দুকধাৰী আছিল পিতা আৰু পুত্ৰ। এই ঘটনাত আক্ৰমণকাৰীসহ মুঠ ১৬ জন লোকৰ মৃত্যু হয়।

আৰক্ষীয়ে প্ৰকাশ কৰা অনুসৰি, এই কাণ্ডক এক লক্ষ্যভিত্তিক ইহুদী-বিৰোধী আক্ৰমণ বুলি সন্দেহ কৰা হৈছে। ৫০ বছৰীয়া পিতৃ ঘটনাস্থলীতে নিহত হয়, আনহাতে ২৪ বছৰীয়া পুত্ৰ চিকিৎসালয়ত সংকটজনক অৱস্থাত আছে। স্থানীয় সংবাদ মাধ্যমে অভিযুক্ত দুজনক ছাজিদ আক্ৰাম আৰু নবীদ আক্ৰাম বুলি চিনাক্ত কৰিছে।

এই আক্ৰমণত আহত হোৱা প্ৰায় ৪০ জন লোক বৰ্তমানো চিকিৎসাধীন আছে, যাৰ ভিতৰত দুজন আৰক্ষী বিষয়াও অন্তৰ্ভুক্ত। নিহতসকলৰ বয়স ১০ বছৰৰ পৰা ৮৭ বছৰৰ ভিতৰত বুলি জানিব পৰা গৈছে। আৰক্ষীৰ মতে, সেই নিশা বীচ্চৰ ওচৰৰ এখন সৰু উদ্যানত অনুষ্ঠিত হোৱা হানুক্কা অনুষ্ঠানত প্ৰায় ১,০০০ লোক উপস্থিত আছিল।

এই ঘটনাৰ সময়ত ওচৰৰ এজন ফলৰ দোকানৰ মালিকে এগৰাকী বন্দুকধাৰীক প্ৰতিহত কৰি বহু লোকৰ জীৱন ৰক্ষা কৰে। তেওঁৰ সাহসিকতাৰ বাবে তেওঁক স্থানীয় লোকসকলে “জীৱন ৰক্ষক নায়ক” বুলি অভিহিত কৰিছে। ঘটনাটোৰ পিছত বণ্ডি অঞ্চলত গভীৰ শোকৰ পৰিৱেশ বিৰাজ কৰিছে।

অষ্ট্ৰেলিয়াৰ প্ৰধানমন্ত্ৰী এন্থনী আলবানিজে ঘটনাস্থলীত উপস্থিত হৈ নিহতসকলৰ স্মৃতিত ফুলৰ থোপা অৰ্পণ কৰে আৰু এই আক্ৰমণক “ইহুদী-বিৰোধী দুষ্টতাৰ পৰিণতি আৰু আমাৰ উপকূলত সংঘটিত এক সন্ত্ৰাসবাদী কাৰ্য” বুলি আখ্যা দিয়ে। তেওঁ ইহুদী সম্প্ৰদায়ৰ কাষত থিয় দিয়া প্ৰতিশ্ৰুতি পুনৰ দৃঢ় কৰে।