মৰিগাঁৱত বিজেপিৰ ‘জন আশীৰ্বাদ যাত্ৰা’; মুখ্যমন্ত্ৰীৰ অংশগ্ৰহণ

বিজেপিৰ শক্তিশালী সাংগঠনিক ভেটিৰ প্ৰদৰ্শন কৰি দেওবাৰে মৰিগাঁও জিলাত এক অভূতপূৰ্ব জোৱাৰ তুলিলে ‘জন আশীৰ্বাদ যাত্ৰা’ই। জাগীৰোডৰ পৰা মৰিগাঁও চহৰলৈ যোৱা এই যাত্ৰাত মুখ্যমন্ত্ৰী ড° হিমন্ত বিশ্ব শৰ্মাই নেতৃত্ব দিয়ে আৰু সমগ্ৰ পথছোৱা হাজাৰ হাজাৰ সমৰ্থকৰ উপস্থিতিত এক গেৰুৱা সাগৰত পৰিণত হয়। আগন্তুক ৰাজনৈতিক প্ৰত্যাহ্বানৰ পূৰ্বে জনসাধাৰণৰ আশীৰ্বাদ বিচাৰি উলিওৱা এই যাত্ৰাৰ দ্বিতীয়টো দিনত শাসকীয় দলটোৰ ব্যাপক জনপ্ৰিয়তা পৰিলক্ষিত হয়।

মুখ্যমন্ত্ৰীৰ সৈতে এই বিশাল ৰেলীত অংশগ্ৰহণ কৰে মন্ত্ৰী পীযূষ হাজৰিকা আৰু ৰাজ্যিক বিজেপিৰ সভাপতি দিলীপ শইকীয়াই। দুয়োগৰাকী নেতাই দলীয় কৰ্মী আৰু সমৰ্থকসকলৰ সৈতে মত-বিনিময় কৰি চৰকাৰৰ উন্নয়নমূলক কাম-কাজৰ খতিয়ান দাঙি ধৰে।

যাত্ৰাৰ পথত অনুষ্ঠিত হোৱা পথসভাসমূহত অংশ লৈ হিমন্ত বিশ্ব শৰ্মাই কয়, “অসমক দেশৰ ভিতৰতে এখন অগ্ৰণী ৰাজ্য হিচাপে গঢ়ি তুলিবলৈ আমাৰ চৰকাৰৰ এই মিছনত জনসাধাৰণৰ আশীৰ্বাদ বিচাৰিছোঁ।”

চৰকাৰে বিগত সময়ছোৱাত আন্তঃগাঁথনি নিৰ্মাণ, সমাজ কল্যাণ আৰু অৰ্থনৈতিক সংস্কাৰৰ ক্ষেত্ৰত লাভ কৰা সফলতাৰ বিষয়েও তেওঁ ৰাইজক অৱগত কৰে। আগন্তুক নিৰ্বাচনৰ পূৰ্বে বিজেপিৰ এই যাত্ৰাই এতিয়া মৰিগাঁও জিলাৰ লগতে সমগ্ৰ উজনি-নামনি অসমতে এক নতুন ৰাজনৈতিক বাতাবৰণৰ সৃষ্টি কৰিছে।