সাংসদ বৈজয়ন্ত পাণ্ডাক অসমৰ নিৰ্বাচনী প্ৰভাৰী নিযুক্তি বিজেপিৰ

আগন্তুক অসম আৰু তামিলনাডু বিধানসভা নিৰ্বাচনৰ বাবে প্ৰস্তুতি চলাই সোমবাৰে ভাৰতীয় জনতা পাৰ্টি চমুকৈ বিজেপিয়ে কেইবাটাও গুৰুত্বপূৰ্ণ সাংগঠনিক নিযুক্তি ঘোষণা কৰে। এই নিযুক্তিৰ জৰিয়তে দলে নিজৰ ৰণনীতি অধিক সুসংগঠিত কৰিব বিচাৰিছে।

দলৰ ৰাষ্ট্ৰীয় উপ-সভাপতি তথা সাংসদ বৈজয়ন্ত পাণ্ডাক অসমৰ নিৰ্বাচনী প্ৰভাৰী হিচাপে নিযুক্তি দিয়া হৈছে। এই সিদ্ধান্তই ২০২৬ চনৰ এপ্ৰিলত অনুষ্ঠিত হ’বলগীয়া অসম বিধানসভা নিৰ্বাচনৰ বাবে বিজেপিৰ আগতীয়া ৰণনীতিৰ ইংগিত বহন কৰিছে।

বৈজয়ন্ত পাণ্ডাৰ উপৰিও, জম্মু-কাশ্মীৰ বিধানসভাৰ বিধায়ক তথা বিৰোধী দলৰ নেতা সুনীল কুমাৰ শৰ্মাক অসমৰ সহ-নিৰ্বাচনী প্ৰভাৰী হিচাপে নিযুক্তি দিয়া হৈছে। লগতে, প্ৰাক্তন কেন্দ্ৰীয় মন্ত্ৰী দৰ্শনা বেন জাৰ্দোশক এই দায়িত্ব দিয়া হৈছে।

আনহাতে, কেন্দ্ৰীয় মন্ত্ৰী পীয়ুষ গোৱেলক তামিলনাডুৰ নিৰ্বাচনী অভিযানৰ তদাৰকৰ দায়িত্ব দিয়া হৈছে। বিজেপিৰ মতে, এই নিযুক্তি সমূহ নিৰ্বাচনী অভিযান পৰিচালনা সুসংগঠিত কৰা, সমন্বয় বৃদ্ধি কৰা আৰু নিৰ্বাচনৰ পূৰ্বেই কাৰ্যকৰী প্ৰস্তুতি নিশ্চিত কৰাৰ বাবে এক বিস্তৃত সাংগঠনিক পুনৰ্গঠনৰ অংশ।