সংগীতৰ আকাশৰ পৰা খহি পৰিল আন এক নক্ষত্ৰ, সমৰ হাজৰিকাৰ মৃত্যু

অসমীয়া সংগীত জগতৰ এক পৰিচিত নাম তথা সুধাকণ্ঠ ড° ভূপেন হাজৰিকাৰ অনুজ ভ্ৰাতৃ সমৰ হাজৰিকাৰ আজি পুৱা দেহাৱসান ঘটে। দীৰ্ঘদিন ধৰি নিউমোনিয়া ৰোগত আক্ৰান্ত হৈ থকা শিল্পীগৰাকীয়ে গুৱাহাটীৰ নিজৰাপাৰস্থিত বাসগৃহত শেষ নিশ্বাস ত্যাগ কৰে। তেওঁৰ বিয়োগত সমগ্ৰ ৰাজ্যৰ সাংস্কৃতিক মহলত গভীৰ শোকৰ ছাঁ পৰিছে।

মুখ্যমন্ত্ৰী ড° হিমন্ত বিশ্ব শৰ্মাই শিল্পীগৰাকীৰ মৃত্যুত গভীৰ শোক প্ৰকাশ কৰি কয় যে সমৰ হাজৰিকাৰ বিয়োগ অসমৰ সাংস্কৃতিক জীৱনৰ বাবে এক অপূৰণীয় ক্ষতি। ইফালে, অসম চৰকাৰে শিল্পীগৰাকীৰ শেষ কৃত্য সম্পূৰ্ণ ৰাজ্যিক মৰ্যাদাৰে সম্পন্ন কৰাৰ কথা ঘোষণা কৰিছে। গুৱাহাটীৰ নৱগ্ৰহ শ্মশানত তেওঁৰ অন্তিম সংস্কাৰ কৰা হ’ব।

সংগীতৰ যাত্ৰা ১৯৬০ চনতে আৰম্ভ কৰা সমৰ হাজৰিকাই বহুকেইখন অসমীয়া ছবিত কণ্ঠদান কৰি শ্ৰোতাৰ মন জয় কৰিছিল। তেওঁৰ ‘উত্তৰ কোঁৱৰ প্ৰতিমা বৰুৱা দেৱী’কে ধৰি কেইবাটাও জনপ্ৰিয় এলবামে অসমীয়া সংগীতক এক নতুন মাত্ৰা দিছিল। কৃষি মন্ত্ৰী অতুল বৰাইও শিল্পীগৰাকীৰ সৃষ্টিশীল প্ৰতিভাক স্মৰণ কৰি শোকসন্তপ্ত পৰিয়াললৈ সমবেদনা জ্ঞাপন কৰে।