২০২৬ত AIUDF-ক সংগহীন কৰাৰ হুংকাৰ গৌৰৱ গগৈৰ! বিজেপিকো আক্ৰমণ কৰি ক’লে- ‘বিদ্বেষৰ বিৰুদ্ধে নকৰোঁ আপোচ’

২০২৬ৰ বিধানসভা নিৰ্বাচনৰ যুঁজত এআইইউডিএফৰ বাবে কংগ্ৰেছৰ দুৱাৰ চিৰদিনৰ বাবে বন্ধ। ১৬ ডিচেম্বৰত এক গুৰুত্বপূৰ্ণ ঘোষণা কৰি অসম কংগ্ৰেছৰ সভাপতি গৌৰৱ গগৈয়ে স্পষ্ট কৰি দিয়ে যে আগন্তুক নিৰ্বাচনত আজমলৰ দলৰ সৈতে কোনো মিত্ৰতা নহয়। এআইইউডিএফক শাসকীয় বিজেপিৰ দৰেই “সাম্প্রদায়িক” আখ্যা দি গগৈয়ে কয় যে এটা সাম্প্ৰদায়িক শক্তিক পৰাস্ত কৰিবলৈ আন এটা একেধৰণৰ শক্তিৰ সৈতে হাত মিলোৱাটো অসম্ভৱ।

২০২১ চনৰ নিৰ্বাচনত এই দুয়োটা দল একেলগে আছিল যদিও ভূপেন বৰাই দায়িত্ব লোৱাৰ পিছতে সেই সম্পৰ্কত ফাট মেলে। বৰ্তমান কংগ্ৰেছে চিপিআই(এম), ৰাইজৰ দল, অসম জাতীয় পৰিষদকে ধৰি আন আঠটা বিৰোধী দলৰ সৈতে এক উমৈহতীয়া মঞ্চ গঠন কৰিছে। মিত্ৰতাৰ সন্দৰ্ভত গগৈয়ে কয় যে সকলো আলোচনা গোপনে চলি আছে আৰু চূড়ান্ত সিদ্ধান্ত নোহোৱালৈকে একো ৰাজহুৱা কৰা নহ’ব।

মুখ্যমন্ত্ৰী হিমন্ত বিশ্ব শৰ্মা আৰু ৰাজ্যিক বিজেপিকো তীব্ৰ আক্ৰমণ কৰে লোকসভাৰ বিৰোধী উপ-দলপতিগৰাকীয়ে। তেওঁ দাবী কৰে যে বিজেপিৰ ভিতৰত এতিয়া ব্যাপক অসন্তুষ্টি বিৰাজ কৰিছে। মুখ্যমন্ত্ৰীৰ বিৰুদ্ধে অভিযোগ উত্থাপন কৰি তেওঁ কয়, “হিমন্ত বিশ্ব শৰ্মাই কেৱল নিজৰ আৰু কেইজনমান ঘনিষ্ঠ মানুহৰ স্বাৰ্থত দল চলাইছে। বিজেপিৰ তৃণমূল পৰ্যায়ৰ কৰ্মীসকলৰ ঘৰৰ সমুখৰ ৰাস্তা আজিও আধৰুৱা, তেওঁলোকে বিশুদ্ধ খোৱাপানী পোৱা নাই আৰু তেওঁলোকৰ গাঁৱৰ স্কুলবোৰো ধ্বংসপ্ৰায়।”

কংগ্ৰেছক ‘মিঞা পন্থী’ বুলি কৰা অভিযোগক গগৈয়ে একেমুখে নাকচ কৰে। তেওঁ কয় যে অসমক ভাল পোৱা সকলো শ্ৰেণীৰ মানুহে এপ্ৰিল মাহৰ পৰা কংগ্ৰেছত যোগদান কৰিছে, যিয়ে এই ভিত্তিহীন অভিযোগৰ উত্তৰ দিছে। ২০২৬ চনৰ মাৰ্চ-এপ্ৰিলত হ’বলগীয়া নিৰ্বাচনত বিজেপিৰ বাবে জয়লাভ কৰাটো সহজ নহ’ব বুলিও তেওঁ হুংকাৰ দিয়ে।