ভাৰতত ভোটাৰৰ সংখ্যা ৯৯.১ কোটিলৈ বৃদ্ধি

ভাৰতত এতিয়া ভোটাৰৰ সংখ্যা ৯৯.১ কোটি লৈ বৃদ্ধি পাইছে। যি যোৱা বছৰ লোকসভা নিৰ্বাচনৰ সময়ত ৯৬.৮৮ কোটি আছিল। নিৰ্বাচন আয়োগে এই তথ্য প্ৰকাশ কৰিছে।ৰাষ্ট্ৰীয় ভোটাৰ দিৱসৰ পূৰ্বে জাৰি কৰা এক বিবৃতিত নিৰ্বাচন আয়োগে কয় যে ভোটাৰ তালিকাসমূহ যুৱ আৰু লিংগ সন্তুলিত দেখা গৈছে।

১৮-২৯ বছৰ বয়সৰ ২১.৭ কোটি যুৱ ভোটাৰ আৰু ভোটাৰ লিংগ অনুপাত ২০২৪ চনৰ ৯৪৮ ৰ পৰা ২০২৫ চনত ৯৫৪ লৈ ছয় পইণ্ট বৃদ্ধি পাইছে। উল্লেখ্য যে ১৯৫০ চনৰ ২৫ জানুৱাৰীত স্থাপিত নিৰ্বাচন আয়োগৰ প্ৰতিষ্ঠা দিৱস উপলক্ষে প্ৰতি বছৰে ৰাষ্ট্ৰীয় ভোটাৰ দিৱস পালন কৰি অহা হৈছে।

দিল্লী বিধানসভা নিৰ্বাচনৰ সময়সূচী ঘোষণা কৰিবলৈ ৭ জানুৱাৰীত ইয়াত এক সংবাদমেলত মুখ্য নিৰ্বাচন আয়ুক্ত ৰাজীৱ কুমাৰে কৈছিল যে ভাৰতে শীঘ্ৰেই এক বিলিয়নতকৈও অধিক ভোটাৰৰ এক নতুন অভিলেখ গঢ়িব।