ৰাজস্থানত গৰমৰ ফলত দুদিনত ১৩জনৰ মৃত্যু

প্ৰচণ্ড গৰমৰ কবলত পৰিছে সমগ্র দেশ। ইয়াৰ পৰা হাতসাৰি যোৱা অসমৰ লগতে সমগ্র উত্তৰ পূৰ্বাঞ্চল। গুৱাহাটী মহানগৰত তাপমাত্ৰা ৪০ ডিগ্ৰী চেলচিয়াছলৈ বৃদ্ধি পাইছে। দেশৰ কিছু অংশত তাপমাত্ৰা ৪৯ ডিগ্ৰী চেলচিয়াছলৈ বৃদ্ধি পাইছে। যাৰ বাবে বতৰ বিজ্ঞান বিভাগে দিল্লী, ৰাজস্থান, মধ্য প্ৰদেশ, গুজৰাট, পঞ্জাৱ আৰু হাৰিয়ানাৰ বাবে হিটৱেভৰ ৰেড এলাৰ্ট জাৰি কৰিছে। শুকুৰবাৰে উত্তৰ ভাৰতৰ গড় সৰ্বাধিক তাপমাত্ৰা আছিল ৪৯ ডিগ্ৰী চেলচিয়াছ আৰু সৰ্বনিম্ন আছিল ৩১ ডিগ্ৰী চেলচিয়াছ। ৰাজস্থানত গৰমৰ ফলত ৫ জন লোকৰ মৃত্যু হৈছে। ৰাজ্যখনত ২ দিনত এই সংখ্যা ১৩ লৈ বৃদ্ধি পাইছে। কাশ্মীৰ উপত্যকাতো সৰ্বাধিক তাপমাত্ৰা ৩২.২ ডিগ্ৰী চেলচিয়াছ ৰেকৰ্ড কৰা হৈছে। এইটো ১১ বছৰত সৰ্বাধিক। ২০১৩ ৰ ২৫ মে’ত কাশ্মীৰ উপত্যকাতো সৰ্বাধিক তাপমাত্ৰা আছিল ৩২.২ ডিগ্ৰী চেলচিয়াছ। জম্মু আৰু কাশ্মীৰকে ধৰি উত্তৰ ভাৰতৰ বেছিভাগ ৰাজ্যত তাপ প্ৰবাহ প্ৰতিহত কৰিবলৈ নিৰ্দেশনা জাৰি কৰা হৈছে। ৰাজস্থানৰ অনাময় কৰ্মীসকলক পুৱা ৫ বজাৰ পৰা পুৱা ১০ বজালৈ কাম কৰিবলৈ কোৱা হৈছে। মধ্য প্ৰদেশ, পঞ্জাৱ আৰু দিল্লীৰ চিকিৎসকসকলে ৰোগী আৰু বৃদ্ধসকলক দিনটোত যাত্ৰা নকৰিবলৈ পৰামৰ্শ দিছে।হিমাচল প্ৰদেশৰ কাংৰা জিলাৰ সকলো বিদ্যালয় ২৫ মে’ত বন্ধ ৰখা হৈছে। শুকুৰবাৰে সৰ্বাধিক তাপমাত্ৰা ৪০ ডিগ্ৰী চেলচিয়াছতকৈ অধিক আছিল।