ব্ৰাজিলত বানপানীৰ ফলত ১৬৯, ম্যানমাৰতগ্ৰীষ্ম প্ৰবাহৰ ফলত ১,৫০০ জন লোকৰ মৃত্যু

জলবায়ু পৰিৱৰ্তনৰ ফলত ভাৰতৰ লাখ লাখ লোকে প্ৰচণ্ড গ্ৰীষ্ম প্ৰবাহৰ সন্মুখীন হৈছে। ইয়াৰ মাজতে জলবায়ু পৰিৱৰ্তনক লৈ এক উদ্বেগজনক প্ৰতিবেদন প্ৰকাশ পাইছে।এই প্ৰতিবেদন অনুসৰি যে যোৱা বছৰ ডিচেম্বৰত ডুবাইত (চিঅ’পি২৮) আন্তঃৰাষ্ট্ৰীয় জলবায়ু সন্মিলনৰ পিছত প্ৰাকৃতিক দুৰ্যোগৰ ফলত বিশ্বজুৰি ৪১ বিলিয়ন ডলাৰৰো অধিক লোকচান হৈছে। ব্ৰিটেইনৰ বেচৰকাৰী সংগঠন ক্ৰিষ্টিয়ান এইডৰ প্ৰতিবেদন অনুসৰি যোৱা ছয় মাহত বতৰ সম্পৰ্কীয় চাৰিটা ঘটনাত ২,৫০০ ৰো অধিক লোকৰ মৃত্যু হৈছে। সংগঠনটোৱে কয় যে জীৱাশ্ম ইন্ধনৰ ব্যৱহাৰ নিয়ন্ত্ৰণ কৰা আৰু জলবায়ু দুৰ্যোগৰ মোকাবিলাত নিম্ন আয়ৰ দেশসমূহক সহায় কৰাৰ দিশত সংযুক্ত আৰৱ আমিৰাত চিঅ’পি২৮ৰ পৰা পিছত যিধৰণে অগ্ৰগতি হ’ব লাগিছিল হোৱা নাই। প্ৰতিবেদনত কোৱা হৈছে যে ধনী দেশবোৰে সেউজগৃহ গেছ নিৰ্গমনত এক ডাঙৰ ভূমিকা পালন কৰে। এই গেছবোৰে বায়ুমণ্ডল গৰম কৰি আছে আৰু বতৰৰ অত্যাধিক ঘটনা বৃদ্ধি কৰিছে, সেয়েহে এই দেশবোৰে তেওঁলোকৰ দায়িত্ব বুজিব লাগে আৰু আন দেশবোৰক প্ৰতিকূল বতৰৰ ঘটনাৰ পৰা পুনৰুদ্ধাৰ কৰাত সহায় কৰিবলৈ তেওঁলোকৰ লোকচান আৰু ক্ষতিপুঁজি বৃদ্ধি কৰিব লাগে। যোৱা বছৰ ডিচেম্বৰত ডুবাইত ৰাষ্ট্ৰসংঘৰ জলবায়ু আলোচনাত প্ৰতিনিধিসকলে জলবায়ু পৰিৱৰ্তনৰ প্ৰভাৱবোৰ সমাধান কৰিবলৈ এক নতুন লোকচান আৰু ক্ষতি পুঁজিৰ ওপৰত সন্মত হৈছিল যি ‘গোলকীয় দক্ষিণ’ৰ দৰিদ্ৰ দেশবোৰক অসামঞ্জস্যপূৰ্ণভাৱে প্ৰভাৱিত কৰে। প্ৰতিবেদন অনুসৰি, ব্ৰাজিলত বানপানীৰ ফলত কমেও ১৬৯ জন লোকৰ মৃত্যু হৈছিল আৰু কমেও সাত বিলিয়ন আমেৰিকান ডলাৰৰ অৰ্থনৈতিক লোকচান হৈছিল। দক্ষিণ আৰু দক্ষিণ-পশ্চিম এছিয়াত বানপানীৰ ফলত
কেৱল ইউএই-ত কমেও ২১৪জন লোকৰ মৃত্যু হৈছিল আৰু ৮৫০ নিযুত ডলাৰ মূল্যৰ বীমা লোকচান হৈছিল। প্ৰতিবেদন অনুসৰি, পশ্চিম, দক্ষিণ আৰু দক্ষিণ-পূব এছিয়াত হোৱা অত্যাধিক গ্ৰীষ্ম প্ৰবাহৰ ফলত কেৱল ম্যানমাৰত ১,৫০০ ৰো অধিক লোকৰ মৃত্যু হৈছে।