বিৰোধীৰ কণ্ঠ ৰুদ্ধ কৰিবলৈ কেন্দ্ৰীয় সংস্থাৰ অপব্যৱাহৰ কৰিছে বিজেপি চৰকাৰে! বিদেশত পুনৰ সৰৱ ৰাহুল গান্ধী

দেশৰ স্বতন্ত্ৰ প্ৰতিষ্ঠানসমূহৰ নিৰপেক্ষতাক লৈ অব্যাহত থকা বিতৰ্কই সোমবাৰে জাৰ্মানীত এক নতুন মাত্ৰা লাভ কৰে। ভাৰতৰ প্ৰশাসনিক তন্ত্ৰক ৰাজনৈতিক উদ্দেশ্যত ব্যৱহাৰ কৰাৰ যি গুৰুতৰ অভিযোগ দীৰ্ঘদিন ধৰি উত্থাপন হৈ আহিছে, সেই প্ৰসংগতে পুনৰবাৰ মোদী চৰকাৰক লক্ষ্য কৰি লয় কংগ্ৰেছ সাংসদ তথা লোকসভাৰ বিৰোধী দলপতি ৰাহুল গান্ধীয়ে। হাৰ্টি স্কুলত আয়োজিত এক অনুষ্ঠানত অংশ লৈ তেওঁ দাবী কৰে যে এনফৰ্চমেণ্ট ডাইৰেক্টৰেট আৰু চিবিআইৰ দৰে গুৰুত্বপূৰ্ণ সংস্থাসমূহক বিৰোধীৰ বিৰুদ্ধে হেঁচা প্ৰয়োগ কৰাৰ এক হাথিয়াৰ হিচাপেহে বৰ্তমান গঢ়ি তোলা হৈছে।

এই প্ৰতিষ্ঠানিক দখলদাৰীৰ ফলত নিৰ্বাচনী যুঁজৰ সমতা নষ্ট হোৱা বুলি উল্লেখ কৰি গান্ধীয়ে কয় যে ব্যৱসায়ীসকলক ভাবুকি দি বিৰোধীৰ পৰা আঁতৰাই ৰখাৰ এক পৰিকল্পিত চেষ্টা চলিছে। তেওঁৰ মতে, গণতান্ত্ৰিক তৰ্কৰ পৰিৱৰ্তে চৰকাৰী শক্তিৰ জৰিয়তেহে বিজেপিয়ে নিজৰ আধিপত্য বিস্তাৰ কৰিব বিচাৰিছে। আনকি নিৰ্বাচন আয়োগৰ দৰে সংস্থাসমূহো ৰাজনৈতিক প্ৰভাৱৰ পৰা মুক্ত নহয় বুলি তেওঁ সোঁৱৰাই দিয়ে। ইণ্ডিয়া মিত্ৰজোঁটৰ মাজত কৌশলগত প্ৰতিদ্বন্দ্বিতা থাকিলেও আৰএছএছৰ মতাদৰ্শৰ বিৰুদ্ধে সকলো দল ঐক্যবদ্ধ বুলিও তেওঁ স্পষ্ট কৰি দিয়ে।

দেশৰ ক্ষমতা অতিমাত্ৰা কেন্দ্ৰীয়কৰণ কৰাৰ ফলত বিভিন্ন ভাষা আৰু সম্প্ৰদায়ৰ মাজত বিভেদ সৃষ্টি হোৱাৰ সম্ভাৱনা ব্যক্ত কৰি তেওঁ কয় যে ভাৰতৰ বৈচিত্ৰ্যক কোনো এজন ব্যক্তিৰ একক সিদ্ধান্তৰে পৰিচালনা কৰিব নোৱাৰি। সংবিধান আৰু সমতাৰ নীতি সুৰক্ষিত কৰিবলৈ তেওঁৰ দল আৰু মিত্ৰজোঁটে এই ব্যৱস্থাৰ বিৰুদ্ধে তীব্ৰ প্ৰতিৰোধ গঢ়ি তুলিব বুলিও ৰাহুল গান্ধীয়ে মন্তব্য কৰে। পাঁচদিনীয়া জাৰ্মানী ভ্ৰমণৰ কালছোৱাত দিয়া তেওঁৰ এই ভাষণে এতিয়া দেশৰ ৰাজনীতিত তীব্ৰ প্ৰতিক্ৰিয়াৰ সৃষ্টি কৰিছে।