দ্বিতীয় পৰ্যায়ৰ লোকসভা নিৰ্বাচনৰ মনোনয়ন দাখিলৰ প্ৰক্ৰিয়া আৰম্ভ

১২ খন ৰাজ্যৰ ৮৮ টা সংসদীয় সমষ্টিৰ বাবে দ্বিতীয় পৰ্যায়ৰ লোকসভা নিৰ্বাচনৰ বাবে মনোনয়ন দাখিলৰ প্ৰক্ৰিয়া বৃহস্পতিবাৰৰ পৰা আৰম্ভ হৈছে। ৰাষ্ট্ৰপতিৰ হৈ নিৰ্বাচন আয়োগে বৃহস্পতিবাৰে পুৱা ২৬ এপ্ৰিলত অনুষ্ঠিত হ’বলগীয়া দ্বিতীয় পৰ্যায়ৰ সংসদীয় নিৰ্বাচনৰ বাবে জাননী জাৰি কৰে। এই পৰ্যায়ৰ বাবে মনোনয়ন দাখিলৰ অন্তিম তাৰিখ হৈছে এপ্ৰিলৰ ৪ তাৰিখ। জম্মু আৰু কাশ্মীৰৰ বাহিৰে সকলো ৰাজ্য আৰু কেন্দ্ৰীয় শাসিত অঞ্চলত মনোনয়ন পত্ৰৰ পৰীক্ষণ ৫ এপ্ৰিলত কৰা হ’ব।

জম্মু আৰু কাশ্মীৰত, মনোনয়ন পত্ৰৰ পৰীক্ষণ ৬ এপ্ৰিলত অনুষ্ঠিত হ’ব। বাহৰী মণিপুৰ লোকসভা সমষ্টিৰ এটা অংশতো এই পৰ্যায়ত নিৰ্বাচন অনুষ্ঠিত হ’ব। বাহৰী মণিপুৰ সমষ্টিৰ নিৰ্বাচনৰ অধিসূচনা ২০ মাৰ্চত প্ৰথম পৰ্যায়ৰ বাবে জাৰী কৰা গেজেট অধিসূচনাত অন্তৰ্ভুক্ত কৰা হৈছিল।

বাহৰী মণিপুৰ লোকসভা সমষ্টিৰ অন্তৰ্গত পোন্ধৰটা বিধানসভা সমষ্টিত ১৯ এপ্ৰিলত প্ৰথম পৰ্যায়ত নিৰ্বাচন অনুষ্ঠিত হ’ব, আনহাতে সমষ্টিটোৰ অধীনৰ ১৩ টা সমষ্টিত ২৬ এপ্ৰিলত দ্বিতীয় পৰ্যায়ত নিৰ্বাচন অনুষ্ঠিত হ’ব।  ইয়াৰ উপৰিও অসম, বিহাৰ, ছত্তীশগড়, জম্মু-কাশ্মীৰ, কৰ্ণাটক, কেৰালা, মহাৰাষ্ট্ৰ, মধ্য প্ৰদেশ, ৰাজস্থান, ত্ৰিপুৰা, উত্তৰ প্ৰদেশ আৰু পশ্চিম বংগৰ বহুতো আসনত দ্বিতীয় পৰ্যায়ত নিৰ্বাচন অনুষ্ঠিত হ’ব।