হিমন্ত বিশ্ব শৰ্মা দেশৰ আটাইতকৈ ভ্ৰষ্ট মুখ্যমন্ত্ৰীঃ জুবিন গাৰ্গৰ সমন্বয়ৰ আদৰ্শৰে কংগ্ৰেছক আগবঢ়োৱাৰ সংকল্প ৰাহুল গান্ধীৰ

অসমৰ ৰাজনৈতিক আকাশত এতিয়া এক তীব্ৰ জোকাৰণিৰ সৃষ্টি কৰিছে কংগ্ৰেছ নেতা ৰাহুল গান্ধীৰ এটা বিশেষ ভাষণে। নিৰ্বাচনী প্ৰচাৰৰ মাজতে মুখ্যমন্ত্ৰী হিমন্ত বিশ্ব শৰ্মাক দেশৰ আটাইতকৈ ভ্ৰষ্ট আৰু ঘৃণা বিয়পোৱা নেতা আখ্যা দি দেওবাৰে এক আক্ৰমণাত্মক স্থিতি গ্ৰহণ কৰে গান্ধীয়ে। শংকৰদেৱ, আজান পীৰ আৰু জুবিন গাৰ্গৰ এই সমন্বয়ৰ ভূমিত বিভাজনৰ ৰাজনীতি চলিবলৈ দিয়া নহ’ব বুলিও তেওঁ স্পষ্ট কৰি দিয়ে।

দলীয় কৰ্মী আৰু সমৰ্থকসকলক সম্বোধন কৰি ৰাহুল গান্ধীয়ে ভাৰতীয় জাতীয় কংগ্ৰেছৰ আদৰ্শক প্ৰাণৰ শিল্পী জুবিন গাৰ্গৰ উত্তৰাধিকাৰৰ সৈতে তুলনা কৰে। তেওঁ কয় যে জুবিন গাৰ্গে গোটেই জীৱন অসমৰ মানুহক একগোট কৰিবলৈ কাম কৰিছে আৰু তেওঁ কেতিয়াও কাৰোৰে সৈতে দুৰ্ব্যৱহাৰ কৰা নাই। কংগ্ৰেছেও একেই দৰ্শন অনুসৰণ কৰে বুলি উল্লেখ কৰি গান্ধীয়ে কয়, “ঘৃণাৰ বিৰুদ্ধে প্ৰেম বিয়পোৱাটোৱেই হৈছে কংগ্ৰেছৰ মূল নীতি।”

বিজেপি চৰকাৰৰ বিৰুদ্ধে তীব্ৰ বিষোদগাৰ প্ৰকাশ কৰি গান্ধীয়ে অভিযোগ কৰে যে বৰ্তমানৰ প্ৰশাসনে বিভিন্ন সম্প্ৰদায়ৰ মাজত বিভাজনৰ সৃষ্টি কৰিছে। হিমন্ত বিশ্ব শৰ্মাৰ নেতৃত্বত চৰকাৰখনে মানুহ আৰু সম্প্ৰদায়ৰ মাজত কেৱল ঘৃণা বিয়পোৱা কাৰ্যত লিপ্ত থকা বুলিও তেওঁ সমালোচনা কৰে। মুখ্যমন্ত্ৰীক সকীয়াই দি তেওঁ আৰু কয়, “তেওঁক আৰু কেইদিনমান ক’বলৈ দিয়ক। ইয়াৰ পাছত অসমত কংগ্ৰেছে চৰকাৰ গঠন কৰিব আৰু তেওঁ ক্ষমা খুজিলেও তেওঁৰ বিৰুদ্ধে আইনী ব্যৱস্থা নিশ্চিতভাৱে গ্ৰহণ কৰা হ’ব।”

ৰাজ্যখনত নিৰ্বাচনী যুঁজ তুংগত উঠাৰ সময়তে বিজেপি আৰু কংগ্ৰেছৰ মাজত চলি থকা এই বাকযুদ্ধই এতিয়া বিশেষ চৰ্চা লাভ কৰিছে। ৰাহুল গান্ধীৰ এই মন্তব্যই এতিয়া ৰাজ্যৰ ৰাজনৈতিক পৰিৱেশ অধিক উত্তপ্ত কৰি তুলিছে।