দিল্লীৰ বায়ু প্ৰদূষণৰ ভয়াৱহ ৰূপ! বিষাক্ত ধোঁৱা আৰু কুঁৱলীৰ আৱৰ্তত স্তব্ধ জনজীৱন

দেশৰ ৰাজধানী চহৰখনৰ আকাশত এতিয়া কেৱল ধোঁৱা আৰু কুঁৱলীৰ ডাঠ আৱৰণ। শীতৰ আগমনৰ লগে লগে দিল্লীৰ বায়ুৰ মানদণ্ড যি দৰে নিম্নগামী হয়, এইবাৰো তাৰ ব্যতিক্ৰম নহ’ল। সোমবাৰে পুৱা দিল্লীৰ বায়ুৰ গুণাগুণ সূচকাংক (AQI) ৩৬৬ লৈ বৃদ্ধি পায়, যিটো ‘অতিশয় পুতৌজনক’ শ্ৰেণীৰ অন্তৰ্ভুক্ত। নাৰেলা আৰু আনন্দ বিহাৰৰ দৰে বহুকেইটা অঞ্চলত এই প্ৰদূষণৰ মাত্ৰাই ৪০০ ৰ সীমা অতিক্ৰম কৰি ‘ভয়াৱহ’ পৰ্যায়ত উপনীত হয়। এই বিষাক্ত বায়ুৰ বাবে চহৰখনত বসবাস কৰা লোকসকলৰ স্বাস্হ্যৰ প্ৰতি তীব্ৰ ভাবুকিৰ সৃষ্টি হৈছে।

বায়ু প্ৰদূষণৰ লগতে দৃশ্যমানতা হ্ৰাস পোৱাৰ ফলত ইন্দিৰা গান্ধী আন্তঃৰাষ্ট্ৰীয় বিমানবন্দৰত বিমান চলাচলত বিসংগতিয়ে দেখা দিয়ে। কম দৃশ্যমানতাৰ বাবে পুৱাৰ ভাগত ১৫০ খনতকৈও অধিক বিমানৰ উৰণত পলম হয়। বিমানবন্দৰ কৰ্তৃপক্ষই যাত্ৰীসকলক বিমানৰ শেহতীয়া স্থিতি জানিবলৈ সংশ্লিষ্ট এয়াৰলাইনছৰ সৈতে যোগাযোগ কৰিবলৈ পৰামৰ্শ দিয়ে। উল্লেখযোগ্য যে, দেওবাৰেও প্ৰায় ১০০ খন বিমান বাতিল কৰিবলগীয়া হোৱাত যাত্ৰীসকল চৰম দুৰ্ভোগৰ সন্মুখীন হয়।

বতৰ বিজ্ঞান কেন্দ্ৰৰ আগলি বতৰা অনুসৰি, অনাগত কেইটামান দিনত দিল্লীত মধ্যমীয়া কুঁৱলীৰ প্ৰভাৱ অব্যাহত থাকিব। চহৰখনৰ সৰ্বনিম্ন তাপমাত্ৰা ৯ ডিগ্ৰী চেলচিয়াছৰ আশে-পাশে থাকিব। প্ৰদূষণ নিয়ন্ত্ৰণৰ বাবে গ্ৰেপ (GRAP) নিৰ্দেশাৱলীৰ অধীনত বিভিন্ন বাধা-নিষেধ আৰোপ কৰা হৈছে যদিও বৰ্তমানৰ পৰিস্থিতিয়ে দিল্লীবাসীক এক অস্বস্তিকৰ পৰিৱেশৰ মাজত ৰাখিছে। প্ৰদূষণে চৰম সীমা অতিক্ৰম কৰা বাবে ৰাজপথত মাস্ক পৰিহিত লোকৰ সংখ্যাও বৃদ্ধি পোৱা দেখা গৈছে।