মানি লণ্ডাৰিং প্ৰতিৰোধ আইনৰ অধীনত ইডিয়ে ৰুজু কৰা গোচৰৰ দোষী সাব্যস্তৰ হাৰ ৫%

চৰকাৰে সংসদৰ শীতকালীন অধিৱেশনত স্বীকাৰ কৰিছে যে বিত্তীয় আৰু অৰ্থনৈতিক অপৰাধৰ তদন্ত কৰা ভাৰতৰ মুখ্য সংস্থা এনফৰ্চমেণ্ট ডাইৰেক্টৰেট (ইডি)ৰ দ্বাৰা পঞ্জীয়ন কৰা মানি লণ্ডাৰিং প্ৰতিৰোধ আইন (পিএমএলএ) গোচৰত দোষী সাব্যস্ত হোৱাৰ হাৰ ৫% তকৈ কম। কংগ্ৰেছৰ ৰাজ্যসভাৰ সাংসদ ৰণদীপ সিং সুৰজেৱালাই সোধা প্ৰশ্নৰ উত্তৰত বিত্ত ৰাজ্যিক মন্ত্ৰী পংকজ চৌধুৰীয়ে জনায় যে ১ জানুৱাৰী ২০১৯ ৰ পৰা ২১ অক্টোবৰ ২০২৪ ৰ ভিতৰত পিএমএলএৰ অধীনত পঞ্জীয়ন কৰা ৯১১ টা গোচৰৰ ভিতৰত মাত্ৰ ৪২ টা (৪.৬%) গোচৰৰ বাবে দোষী সাব্যস্ত হৈছে আৰু ২৫৭ টা (২৮%) গোচৰ বিচাৰ পৰ্যায়ত উপনীত হৈছে। ইডিৰ দুৰ্বল ট্ৰেক ৰেকৰ্ড অমীমাংসিত গোচৰৰ সংখ্যাতো প্ৰতিফলিত হয়। উচ্চ সদনত এক প্ৰশ্নৰ উত্তৰত চৌধুৰীয়ে কয় যে পিএমএলএৰ অধীনত দাখিল কৰা মুঠ গোচৰৰ ভিতৰত ৬৫৪ টা গোচৰ বা ৭১.৭% গোচৰ এতিয়াও বিচাৰাধীন হৈ আছে।

কেন্দ্ৰীয় চৰকাৰৰ এই মন্তব্যত এইটো স্পষ্ট হৈছে যে বিৰোধীয়ে দীৰ্ঘ দিনে যি দাবী সেই দাবীত যুক্তি আছে। বিৰোধীয়ে দাবী কৰে যে কেন্দ্ৰীয় চৰকাৰে বিৰোধী নেতাসকলক লক্ষ্য কৰি  ইডি আৰু পিএমএলএৰ অপব্যৱহাৰ কৰিছে। এই সন্দৰ্ভত, ইণ্ডিয়ান এক্সপ্ৰেছে ২০২২ চনত এক বাতৰি প্ৰকাশ কৰিছিল যে ২০১৪ চনৰ পৰা ৰাজনীতিবিদসকলৰ বিৰুদ্ধে ইডিৰ গোচৰ চাৰিগুণ বৃদ্ধি পাইছে, আৰু ইয়াৰে ৯৫% গোচৰ বিৰোধী নেতাৰ বিৰুদ্ধে পঞ্জীয়ন হৈছে। ইডিয়ে তেতিয়া উত্তৰ দিছিল যে বৃহৎ সংখ্যক অমীমাংসিত গোচৰ থকা স্বত্বেও, বিচাৰ পৰ্যায়ত উপনীত হোৱা গোচৰবোৰত ইয়াৰ দোষী সাব্যস্ত হোৱাৰ হাৰ ৯৬ শতাংশতকৈ অধিক।

অৱশ্যে, বিৰোধীয়ে এতিয়াও ইডিৰ দ্বাৰা দাখিল কৰা পিএমএলএ গোচৰৰ সংখ্যা আৰু বিচাৰ পৰ্যায়ত উপনীত হোৱা গোচৰবোৰৰ মাজত এক বৃহৎ ব্যৱধান আছে। উল্লেখ্য যে চলিত বৰ্ষৰ আগষ্ট মাহত উচ্চতম ন্যায়ালয়ৰ এখন বিচাৰপীঠে ২০২২ চনত চৰকাৰে পিএমএলএত সংশোধনী উত্থাপন কৰাৰ পিছত ইডিয়ে উপস্থাপন কৰা নিম্ন ‘গোচৰৰ মানদণ্ড আৰু প্ৰমাণৰ মানদণ্ড’ সন্দৰ্ভত প্ৰশ্ন উত্থাপন কৰিছিল আৰু ইয়াৰ ওপৰত গুৰুত্ব দিবলৈ কৈছিল।