“কা”ৰ স্থগিতাদেশ দাবী সদৌ অসম ছাত্ৰ সন্থাৰ

দেশত নাগৰিকত্ব সংশোধনী আইন (“কা”) কাৰ্যকৰী হোৱাৰ লগে লগে ইয়াৰ বিৰুদ্ধে প্ৰতিবাদ আৰম্ভ হয়। সদৌ অসম ছাত্ৰ সন্থাই বিষয়টোক লৈ উচ্চতম ন্যায়ালয়ৰ কাষ চাপিছে। আছুৱে উচ্চতম ন্যায়ালয়ত “কা” নিয়মক প্ৰত্যাহ্বান জনাই আৰু আইনৰ ওপৰত নিষেধাজ্ঞা বিচাৰি এখন আবেদন দাখিল কৰিছে। তেওঁলোকে শেহতীয়াভাৱে প্ৰধানমন্ত্ৰী নৰেন্দ্ৰ মোদীৰ অসম ভ্ৰমণৰ পূৰ্বে “কা” বিৰুদ্ধে বাইক ৰেলী উলিয়াইছিল। দিল্লীত সংবাদ মাধ্যমৰ সৈতে বাৰ্তালাপ কৰি আছুৰ সাধাৰণ সম্পাদক উৎপল শৰ্মাই কয়, “উচ্চতম ন্যায়ালয়ৰ ওপৰত আমাৰ সম্পূৰ্ণ বিশ্বাস আছে আৰু ই নিশ্চিতভাৱে উত্তৰ-পূবৰ লোকসকলক ন্যায় প্ৰদান কৰিব। এই আশাৰে, আমি উচ্চতম ন্যায়ালয়ত “কা” নিয়মবোৰক প্ৰত্যাহ্বান জনাইছো আৰু আমি ইয়াৰ ওপৰত স্থগিতাদেশ দাবী কৰিছো। তেওঁলোকে কয় যে কেন্দ্ৰৰ এই পদক্ষেপৰ বিৰুদ্ধে আইনী যুঁজ দিব। আনহাতে, বিতৰ্কিত নাগৰিকত্ব (সংশোধনী) আইন (“কা”)-২০১৯ ৰূপায়ণক লৈ অসমৰ বিৰোধী দলসমূহে ভাৰতীয় জনতা পাৰ্টি নেতৃত্বাধীন কেন্দ্ৰীয় চৰকাৰক সমালোচনা কৰে। অসমৰ ১৬-দলীয় যুটীয়া বিৰোধী মঞ্চইও মঙলবাৰে ৰাজ্যব্যাপী ধৰ্মঘট ঘোষণা কৰে।