মনৰেগা বন্ধৰ বিৰুদ্ধে কংগ্ৰেছৰ তীব্ৰ হুংকাৰ! জনতাৰ কাষলৈ যাবলৈ ১০ জানুৱাৰীৰ পৰা আৰম্ভ হ’ব ‘সংগ্ৰাম’

কেন্দ্ৰীয় চৰকাৰে বহু চৰ্চিত মহাত্মা গান্ধী ৰাষ্ট্ৰীয় গ্ৰাম্য নিয়োগ নিশ্চিতকৰণ আইন বাতিল কৰি নতুন আঁচনি ঘোষণা কৰাৰ লগে লগে দেশৰ ৰাজনীতিত এক নতুন ধুমুহাৰ সৃষ্টি হৈছে। কেন্দ্ৰই মনৰেগাৰ ঠাইত ‘বিকশিত ভাৰত-গ্যেৰাণ্টি ফৰ ৰোজগাৰ এণ্ড আজীৱিকা মিছন (গ্ৰামীণ)’ চমুকৈ VB-G RAM G নামৰ এক নতুন অভিযান আৰম্ভ কৰিছে। চৰকাৰৰ এই পদক্ষেপৰ বিৰুদ্ধে তীব্ৰ প্ৰতিবাদ সাব্যস্ত কৰি কংগ্ৰেছে দেশজুৰি ‘মনৰেগা বচাও সংগ্ৰাম’ নামৰ এক বিশেষ অভিযান চলোৱাৰ কথা ঘোষণা কৰিছে।

প্ৰাপ্ত তথ্য অনুসৰি, অহা ১০ জানুৱাৰীৰ পৰা আৰম্ভ হ’বলগীয়া এই অভিযানৰ জৰিয়তে কংগ্ৰেছে গাঁৱে গাঁৱে গৈ চৰকাৰৰ এই সিদ্ধান্তৰ বিৰুদ্ধে জনমত গঠন কৰিব। কংগ্ৰেছৰ মতে, মনৰেগা কেৱল এখন আঁচনি নহয়, ই গ্ৰাম্য জনসাধাৰণৰ জীৱিকাৰ এক আইনী অধিকাৰ আছিল, যিটো বৰ্তমানৰ চৰকাৰে কাঢ়ি ল’বলৈ বিচাৰিছে। উল্লেখযোগ্য যে, নতুন মিছনটোৱে পূৰ্বৰ দৰে কামৰ অধিকাৰ সুনিশ্চিত কৰিব নে নাই, তাক লৈ বিৰোধী দলটোৱে গভীৰ সন্দেহ প্ৰকাশ কৰিছে।

ইফালে, কেন্দ্ৰীয় চৰকাৰে দাবী কৰিছে যে নতুন আঁচনিখনে গ্ৰাম্য নিয়োগৰ ক্ষেত্ৰত অধিক দক্ষতা আৰু আধুনিকতা কঢ়িয়াই আনিব। কিন্তু কংগ্ৰেছে অভিযোগ কৰিছে যে এয়া দৰিদ্ৰ জনসাধাৰণৰ সুৰক্ষা কৱচ ধ্বংস কৰাৰ এক ষড়যন্ত্ৰহে। ১০ জানুৱাৰীৰ পৰা আৰম্ভ হ’বলগীয়া এই ‘সংগ্ৰাম’ৰ জৰিয়তে কংগ্ৰেছে কেন্দ্ৰীয় চৰকাৰক কেনেধৰণে প্ৰত্যাহ্বান জনায়, সেয়া এতিয়া লক্ষণীয় হ’ব।